Eski i en Lobstak pour ou prese?
1 Laplipar dimoun i viv en lavi vreman okipe. Bann Temwen Zeova i parmi bann dimoun ki pli okipe—etidye Parol Bondye, asiste renyon kongregasyon, e partisip dan travay predikasyon. Deplis, nou okipe avek bann travay profann, travay kot lakour oubyen lekol, e en kantite lezot responsabilite, ki zot tou zot pran letan. Sa i en defi sirtou pour bann sef fanmiy.
2 Lefe ki i annan bann kondisyon ekonomik ki pa favorab dan plizyer landrwa, petet bann sef fanmiy i bezwen travay dir pour plizyer er-d-tan pour zot ganny zot lavi. Kan bann travay profann i pran en kantite zot letan ek lafors, pa reste zot bokou letan pour partisip dan predikasyon. Vi ki zot annan en lobligasyon pour fourni zot fanmiy avek bann bezwen materyel, serten i kapab santi ki zot kapab annan en partisipasyon limite dan minister. (1 Tim. 5:8) I vre ki, denozour i annan en kantite presyon an rapor avek obtenir bann nesesite lavi. Me travay profann en dimoun pa devret vin en lobstak pour pres sa bon nouvel. (Mark 13:10) Alor, nou devret egzamin nou sitiasyon aktyel.
3 Lefe ki sitiasyon sa monn pe touzour sanze, en sef fanmiy i kapab annan tandans pour pas plis letan dan son travay, avek lentansyon pour anmas en pe larzan pour bann moman enprevi. (1 Kor. 7:31) I vre ki travay anplis i permet zot ganny plis bann keksoz materyel oubyen i permet zot annan plis pour diverti. Me eski sa pou fer sa fanmiy ere e satisfe, si sa i ganny fer par sakrifye letan ki zot pase dan bann aktivite spirityel e asiste renyon regilyerman? Sertennman nou ti pou anvi evit okenn keksoz ki pou met nou spirityalite an danze. Swiv konsey Zezi pour “akimil larises dan lesyel” e vin “ris devan Bondye” i meyer keksoz pour fer.—Mat. 6:19-21; Lik 12:15-21.
4 Rod bann Lentere Rwayonm premye: Zezi ti ansenny son bann disip pour met bann keksoz spirityel avan tou lezot keksoz. I ti ankouraz zot: “Pa bezwen pran traka e demann zot lekor, ‘Ki nou pou manze?’ oubyen, ‘Ki nou pou bwar?’ oubyen, ‘Ki nou pou mete?’ ” Akoz i ti dir sa? I ti eksplike: “Zot Papa ki dan lesyel i konn tou sa ki zot bezwen.” Si nou vreman konvenki ki sa i vre, alor pou napa okenn lobstak ki pou anpes nou fer sa ki Zezi ti dir apre: “Rod plito Rwayonm Bondye ek son lazistis, e limenm i a donn zot anplis tou lezot keksoz [neseser] osi.” Bondye pou fer sir ki nou ganny sa bann keksoz neseser! (Mat. 6:31-33) Sirman, la i pa letan pour nou les nou ganny distrer par bann lenkyetid ki pa neseser pour ganny lavi oubyen par annan en dezir pour nou pli konfortab dan en sistenm ki pou disparet byento.—1 Pyer 5:7; 1 Zan 2:15-17.
5 Lobzektif prensipal travay profann se pour fourni nou bann bezwen materyel. Me ki kantite ki nou bezwen? Zapot Pol ti ekrir: “Annan manze ek lenz sa i ase.” Eski nou pe esey rod plis ki sa? Si sa i leka, nou kapab rekolte bann konsekans ki Pol ti averti nou: “Me bann ki oule vin ris i tonm dan tantasyon e dan pyez en kantite dezir bet e move, ki plonz dimoun dan larin e fer zot maler.” (1 Tim. 6:8, 9; Mat. 6:24; Lik 14:33) Konman nou kapab konnen si nou pe les bann dezir an tro anpes nou progrese?
6 Si bann aktivite profann pe fer nou annan en partisipasyon limite dan predikasyon oubyen nou pa pe vwar sa nesesite pour fer bann sakrifis pour sa bon nouvel, alor i neseser ki nou aziste nou bann priyorite. (Ebr. 13:15, 16) En fason viv pli senp pou vreman itil pour elimin sa lobstak pour nou prese. Bann lentere Rwayonm i devret toultan nou priyorite an sa ki konsern servi nou letan ek lenerzi.
7 Travay ki pa anven: Parol Pol i ankouraz nou pour toultan ‘montre touzour plis lentere dan travay Senyer parski nou konnen ki dan Senyer nou travay pa anven.’ (1 Kor. 15:58) Avan tou, “travay Senyer” se pour pres Rwayonm e fer disip. (Mat. 24:14; 28:19, 20) Pour nou kapab partisip otan ki posib, nou devret progranm en letan pour predikasyon sak semenn e eseye pour pa servi sa letan pour okenn lezot aktivite. (Efe. 5:15-17) Alor, ni travay profann ni okenn lezot keksoz pa pou vin en lobstak pour nou minister.
8 Kan nou ofer nou lekor pour partaz bann laverite Biblik avek lezot, nou eksperyans sa pli gran boner ki vin atraver donnen. (Akt 20:35) Par pourswiv travay predikasyon Rwayonm, nou kapab konfidan konsernan lavenir akoz, ‘Bondye pa enzis pour li oubliy travay ki nou’n fer, ni lanmour ki nou’n montre pour li.’—Ebr. 6:10.