Evite rod “bann Keksoz san valer”
1 En mwayen kominikasyon popiler ozordi se E-mail (imel), bann mesaz ki ganny anvoye lo konpiter. I kapab apropriye pour servi sa mwayen pour partaz leksperyans ek lide personnel avek fanmiy ek zanmi. Me ki “bann keksoz san valer” ki kapab ganny asosye avek imel si nou servi li san en limit?—Prov. 12:11.
2 Bann Lavertisman konsernan Imel: Serten i pretann ki zot santi zot pli pros avek lorganizasyon Zeova kan zot ganny sa ki zot konsider nouvo lenformasyon atraver imel. Sa i kapab enkli bann leksperyans, rakont bann levennman dan Betel, rapor lo bann dezas ek persekisyon, e menm bann lenformasyon konfidansyel ki ganny anonse dan Lekol pour bann ansyen ek asistan ministeryel. Lezot i tro prese pour anvoy sa bann mesaz akoz zot panse ki zot a premye pour revel sa lenformasyon avek zot bann zanmi.
3 Parfwa, bann lenformasyon ek bann leksperyans in ganny mal enterprete ouswa egzazere. Oubyen petet akoz en dimoun pe esey fer li pli gou, sa i kapab donn en move lenpresyon. Sa bann dimoun ki depese pour revel bann tel keksoz, zot souvan napa tou detay. (Prov. 29:20) Dan serten ka, menm kan en zistwar i difisil pour krwar, i ganny rakonte zis pour fer gou. Sa bann tel kalite rapor ki pa korek e ki kapab konfiz lezot, i menm parey avek “bann fab,” ki pa promot en vre latasman avek Bondye.—1 Tim. 4:6, 7.
4 Si ou pas en lenformasyon ki pa korek, dan en serten sans, ou osi ou responsab pour sagren ek konfizyon ki sa i kapab koze. Kan David ti tann nouvel ki tou son bann garson ti’n ganny touye, i “ti desir son lenz” dan son langwas. An realite, pourtan, se zis enn son garson ki ti’n mor. Sa ti trouble David en kantite, me sa nouvel ki ti ganny egzazere ti fer David pli trouble ankor. (2 Sam. 13:30-33) Sirman nou pa pou anvi fer nanryen ki pour tronp oubyen dekouraz nou bann frer ek ser.
5 Konman Bondye i kominik avek nou: Gard antet ki se zis atraver “lesklav fidel e pridan” ki nou Papa seles i kominik avek nou. Sa “lesklav” i annan sa responsabilite pour deside ki lenformasyon ki devret ganny pase avek pep Bondye, osi byen “kan i ler” pour fourni sa lenformasyon. Sa nouritir spirityel i disponib selman atraver lorganizasyon Zeova. Nou devret toultan depan lo lenformasyon ki Bondye i donnen atraver sa mwayen, me non pa lo serten ki servi Internet.—Mat. 24:45, NW.
6 Bann Sit Internet: Nou annan en sit Internet ofisyel: www.watchtower.org. Sa sit i ase pour piblik ganny lenformasyon lo Temwen Zeova. Pa bezwen ki okenn endividi, komite, oubyen kongregasyon i prepar en sit konsernan Temwen Zeova. Serten in met konteni nou piblikasyon avek tou bann verse ek referans byen detaye lo bann sit Internet. E zot in menm demann bann donasyon kan zot ti pe ofer lenformasyon lo bann lasanble. Ki swa zot ganny en profi oubyen non, i pa legal pour reprodwir e distribye bann piblikasyon Temwen Zeova par konpiter. Menm si serten i kapab krwar ki zot pe rann en servis bann frer ek ser, sa pa akseptab e i devret ganny arete.
7 Kan nou pe servi konpiter pour kominike, nou bezwen rezonnab e servi bon zizman. Sa pou asire ki nou lespri i ranpli avek ‘bann bon keksoz ki annan valer.’—Prov. 24:4.