Ekout sa Lapel pour port Latansyon lo Warning Examples for Our Day
Nou tou nou kapab fortifye nou determinasyon pour mentenir nou fidelite par pran aker leson ki nou’n aprann atraver sa resi Labib dan sa video apele Warning Examples for Our Day. Avan ki ou get sa video, silvouple lir Nonm sapit 25 ek lenformasyon siplemanter dan Étude perspicace des Écritures, Volim 2, paz 419, paragraf 3-5, an Angle oubyen Volim 2, paz 302, paragraf 4-6 an Franse. Apre reponn sa bann kestyon: Lekel sa bann Moabit, e akoz Zeova ti dir Moiz pa fer lager avek zot? (Det. 2:9) Ki mannyer Balaam ti fer konplo pour servi bann Moabit pour detri nasyon Izrael? Akoz nou pa devret oubliye ki bokou Izraelit pa ti arive reste fidel diran en leprev zis avan ki zot ti antre dan Later Promiz?—1 Kor. 10:11, 12.
Pandan ki ou get sa video Warning Examples, reflesir lo sa kat laspe lavi ki nou devret konsider seryezman ozordi si nou anvi reste fidel e rezwir faver Bondye. (1) Latitid: Ki mannyer serten Izraelit ti demontre en move latitid anver Zeova ek son laranzman? Okontrer, ki latitid nou devret esey reflekte? (2) Frekantasyon: Akoz Zeova pa ti oule bann Izraelit i vin zanmi avek bann Moabit? (Egz. 34:12; Prov. 13:20) Akoz nou devret byen swazir nou bann zanmi? (3) Moral: Ki pese grav apepre 23,000 Izraelit ti fer akoz move frekantasyon? (1 Kor. 10:8) Ozordi, kwa ki’n atir serten parmi pep Bondye pour komet imoralite, me konman nou kapab protez nou lekor? (4) Ladorasyon: Konman lapirte dan ladorasyon bann Izraelit ti ganny teste? Ki kalite lezot form idolatri ki serten i kapab fer ozordi, me ki mannyer nou kapab evit sa?—Kol. 3:5.
Dan sa dram, konman Yamin ti ganny beni pour reste moralman pir? Par mwayen sa video, ki sa lapel senser ki Konsey Direkter pe fer avek tou vre Kretyen? Si ou en sef fanmiy, akoz ou krwar ki i pou bon ki ou fanmiy i get sa video plizyer fwa?