En Led dan Moman apropriye
1 Kan zapot Pyer ti rekonnet en nesesite pour fortifye bann konpanyon Kretyen, lentere pour zot ti pous li pour donn zot bann bon rapel ek lankourazman. (2 Pyer 1:12, 13; 3:1) I ti ankouraz “bann ki’n resevwar lafwa” pour kontinyen progrese spirityelman pour zot vin “aktif e prodiktif dan konnesans nou Senyer Zezi-Kri.” (2 Pyer 1:1, 5-8) Vi ki Zeova in apel zot e swazir zot, alor Pyer ti oule ki zot reste atase avek sa, pour ki zot kapab ganny trouve “pir, san defo e dan lape avek li.” (2 Pyer 1:10, 11; 3:14) Pour bokou sa bann Kretyen, son lankourazman ti konman en led dan moman apropriye.
2 Ozordi, bann sirveyan Kretyen i annan menm lentere pour pep Bondye. Dan sa bann “letan difisil,” bokou serviter Zeova i bezwen andir bann difikilte. (2 Tim. 3:1) Akoz bann problenm finansyel, lafanmiy, oubyen personnel ki pa zanmen fini, serten i kapab santi parey David: “Bann maler in anserkle mwan, ziska ki mon nepli kapab kont zot. Mon bann fot in akable mwan ki mon pa kapab vwar; zot in vin plis ki seve lo mon latet, e mon napa kouraz.” (Ps. 40:12) Sa bann problenm i kapab vin sitan lour ki sa bann dimoun i kapab negliz bann responsabilite spirityel tre enportan e aret partisip dan minister Kretyen. Me kantmenm zot difikilte, ‘zot pa’n oubliy bann komannman Zeova.’ (Ps. 119:176) I lemoman apropriye pour bann ansyen donn bann dimoun koumsa led ki zot bezwen.—Iza. 32:1, 2.
3 Pour akonpli sa bezwen, bann ansyen in ganny ankouraze pour fer en zefor spesyal pour asiste bann ki pa pe partisip dan travay predikasyon. En zefor entans pour akonpli sa pe ganny fer e pou kontinyen ziska lafen mwan Mars. Bann sirveyan letid liv pe ganny demande pour vizit bann inaktif pour ofer lasistans spirityel avek bi pour ed zot rekonmans zot aktivite avek kongregasyon. Kot i neseser, en letid Labib avek sa dimoun i kapab ganny organize. Lezot proklanmater i kapab ganny demande pour ede. Si ou ganny demande pour fer li, ou zefor pou vreman itil, sirtou si ou donn lankourazman dan en bon fason e avek konprenezon.
4 I annan en rezon pour nou tou zwaye kan en dimoun i rekonmans son aktivite avek kongregasyon. (Lik 15:6) Nou zefor pour ankouraz bann inaktif i kapab vreman vin “en parol ki ganny dir dan son moman apropriye.”—Prov. 25:11.