Parol Bondye i Laverite
1. Ki lenformasyon enportan i annan dan Labib?
1 En psalmis ti ekrir: “Tou ou parol i laverite.” (Ps. 119:160) Atraver son Parol enspire, Zeova i donn bann larepons satisfezan pour bann kestyon pli enportan dan lavi. I ofer rekonfor ek lespwar pour bann ki pe pas dan difikilte. I osi montre nou ki mannyer nou kapab apros avek li. En madanm rekonesan ti dir: “Ler ou aprann laverite dan Labib i konmsi ou pe kit en landrwa ki fernwanr e ki pa gou pour antre dan en lasanm byen eklere, e agreab.” Eski ou fer zefor pour partaz laverite dan Parol Bondye avek lezot dimoun dan tou loportinite?
2. Konman ki Labib i amelyor lavi dimoun?
2 Pwisans pour sanze e Abilite pour atir Dimoun dan Lemonn antye: Laverite dan Labib i annan sa pwisans pour tous leker e sanz lavi. (Ebr. 4:12) En zenn madanm apele Rosa ti tonm dan prostitisyon, osi byen ki labi lalkol ek drog. I dir: “En zour, ler mon ti dan en gran depresyon, en koup Temwen ti eksplik mwan ki Labib i kapab ed nou pour rezourd nou bann problenm. Mon ti konmans etidye Parol Bondye, ki mon ti trouv tre atiran. Dan lespas en mwan, mon ti ganny kouraz pour pran en nouvo depar dan mon lavi. La ki mon annan en bi dan mon lavi, mon pa bezwen led lalkol oubyen drog. Vi ki mon ti sitan anvi vin zanmi Zeova, mon ti determinen pour viv dapre son standar. Si pa ti akoz lasazes pratik Parol Bondye, mon asire ki mon ti pou’n fini met en lafen avek mon lavi.”—Ps. 119:92.
3. Akoz nou pa devret ezite pour partaz mesaz Labib avek lezot dimoun?
3 Kontrerman avek lezot liv, Labib i atir dimoun “dan tou nasyon, tribi, pep ek lalang.” (Rev. 7:9) Lavolonte Bondye se “ki tou dimoun i ganny sove e ganny konnesans [egzakt, NW ] laverite.” (1 Tim. 2:4) Alors, nou pa devret zanmen prezimen ki en dimoun pa pou ekout sa bon nouvel senpleman akoz son fason viv. Okontrer, partaz mesaz Rwayonm avek tou dimoun, e servi lenformasyon direkteman dan Labib kot i posib.
4. Ki mannyer nou kapab servi Labib ler nou pe donn en temwannyaz?
4 Met lanfaz lo Labib: I egziste plizyer loportinite pour servi Labib dan predikasyon. Ler pe prezant magazin, esey enkli sa verse ki dan prezantasyon ki’n ganny sizere. Ler pe servi piblikasyon ki pou ofer pour lemwan, serten i trouv li efikas pour lir en verse apropriye dan zot lentrodiksyon. A sak fwa ki nou fer retourn vizit, lir enn oubyen plizyer verse Labib pour ed sa met lakour ganny plis konnesans egzakt. Ler pe kondwir en letid Labib, konsantre sa diskisyon lo bann verse enportan. Ler nou pa pe partisip dan predikasyon avek kongregasyon, annan en Labib disponib pour servi kan nou ganny en loportinite pour donn temwannyaz enformel.—2 Tim. 2:15.
5. Akoz nou devret fer zefor pour servi Labib dan nou minister?
5 Parol laverite Bondye i annan pouvwar pour motiv dimoun, alor annou ed zot pour benefisye par servi Labib dan tou loportinite apropriye dan nou minister.—1 Tesa. 2:13.