Nouvo Progranm Zournen Lasanble Spesyal

Denozour, i annan en kantite lenformasyon ki disponib konsernan gard nou leker an bonn sante pour kapab annan en pli bon lavi e viv pli lontan. Sa ki pli enportan se kondisyon nou leker senbolik. Tenm zournen lasanble spesyal ki konmans Septanm 2003 i alor apropriye: “Servi Zeova avek en Leker konplet.” (1 Kron. 28:9) Ki nou kapab espere avek pasyans pour aprann?

Sirveyan rezyonal pou koz lo “Ed Lezot pour servi Zeova avek lazwa.” Bann entervyou pou aksantye sa lazwa ki nou gannyen ler nou devlop lentere e kondwir bann letid Labib avek dimoun ki anvi servi Zeova. Tou dimoun dan lasistans pou san dout trouv rekonfor ek lankourazman avek premye diskour orater viziter, “Protez nou Leker dan en Lemonn trouble.” Sesyon bomaten pou konklir avek diskour batenm.

Apremidi, sa diskour “Pare pour ede” pou egzaminen konman nou kapab ed lezot. Ki paran i kapab fer pour protez leker zot zanfan kont bann move lenfliyans e ed zot pour apros avek Zeova? Sa diskour “Ed ou Zanfan pour pran plezir dan Zeova” pou donn bann sizesyon pratik e pou demontre konman sa i kapab ganny fer.

Eski nou pe profit tou provizyon ki Zeova i fer pour gard nou leker senbolik an bonn sante e for? Diskour final orater viziter, “Gard en Leker konplet an servan Zeova,” pou konsantre lo kat laspe esansyel kot nou mentenir nou spirityalite. Ki kantite letan ek zefor ki nou dedye pour lapriyer senser, pour etidye Parol Bondye, pour pres avek devouman, e pour asosye avek lezot Kretyen? Eski nou kapab amelyore dan okenn sa bann laspe?

Zeova i ofer sa lenvitasyon: “Ouver ou leker ver disiplin e ou zorey ver bann parol konnesans.” (Prov. 23:12) Fer ou plan la konmela pour asiste sa zournen lenstriksyon biblik ki vreman itil. Par fer sa, ou pou ganny fortifye pour kontinyen servi Zeova avek en leker konplet e dan lazwa.