Benefisye avek Letid Liv Apros avek Zeova
1 Dan Lasanble Distrik “Mars avek Bondye,” nou ti byen kontan pour resevwar sa liv Apros avek Zeova. Bokou nou in konmans lir sa liv toudswit. San dout, bokou ti ganny pouse pour fer li par sa teks pour lannen 2003: “Apros avek Bondye, e i ava apros avek zot.”—Zak 4:8.
2 An Oktob nou pou konmans egzamin sa liv Apros avek Zeova dan Letid Liv Kongregasyon. Ki mannyer nou kapab benefisye en kantite avek nou letid? Preparasyon i enportan. I pou pran de semenn pour etidye sak sapit, avek en pti gin paragraf ki’n ganny progranmen pour etidye sak semenn. Sa pou permet ase letan pour ou donn bann komanter ki sorti dan ou leker baze lo ou letid e lo refleksyon ki ou’n fer lo sa lenformasyon. Anplis ki sa, nou pou egzamin pli pti gin paragraf dan bann semenn ki nou pe reviz lafen en sapit, pour permet letan pour servi en laspe spesyal dan sa liv.
3 Apartir sapit 2, alafen sak sapit i annan en bwat ki annan pour tit “Kestyon pour Refleksyon.” Apre ki sa dernyen paragraf dan sa sapit in ganny egzaminen, sirveyan letid liv pou diskit sa bwat avek group. I pou ankouraz bann dimoun dan group pour eksprim sa ki zot panse, rod bann bon pwen dan zot refleksyon ki zot in fer lo sa bann verse Labib. (Prov. 20:5) Apard bann kestyon ki annan dan sa bwat, i kapab parler demann bann kestyon parey: “Ki sa lenformasyon i dir ou lo Zeova? Ki lefe i fer dan ou lavi? Ki mannyer ou kapab servi li pour ed lezot?” Son lobzektif se pour fer bann dimoun fer bann komanter senser, non pa pour teste sa group konsernan bann pti detay.
4 Sa liv Apros avek Zeova i diferan avek lezot piblikasyon letid. Menm si tou piblikasyon ‘lesklav fidel e pridan’ i glorifye Zeova, sa liv i antyerman diskit bann kalite Zeova. (Mat. 24:45-47) Sa i en loportinite merveye ki pe esper nou! Nou pou benefisye en kantite avek en letid oprofon lo personnalite Zeova. Fotespere ki sa letid i ed nou pour vin pli pros avek nou Papa ki dan lesyel, e ki nou vin pli efikas pour ed lezot pour fer parey.