Letid dan liv Apros avek Zeova i konmans semenn le 6 Zanvye
1. Ki loportinite nou pou gannyen pour apros pli pre avek Zeova konmansman semenn le 6 Zanvye?
1 Zeova i anvi nou apros avek li. (Zak 4:8) Pour nou kapab fer sa, nou pou etidye liv Apros avek Zeova konmansman semenn le 6 Zanvye, dan Letid Labib Kongregasyon. Konsernan bi sa liv, son lentrodiksyon i dir: “Reflesir lo lafason ki Zeova i demontre sak son bann kalite, dekouver konman Zezi ti reflekte zot parfetman, e konpran konman nou osi nou kapab devlop zot, pou fer nou vin pli pros avek Bondye.” Bann kongregasyon in deza egzamin sa liv pandan lannen 2004 ek 2005. Par kont, pour bokou dan sa de milyon proklanmater ki’n vin dan laverite apre sa bann lannen, pour zot sa i premye fwa ki bann kalite atiran Zeova i ganny egzaminen o profon. Pour bann ki’n deza etidye sa liv, sa revizyon pou ed zot ogmant zot lapresyasyon pour bann kalite Zeova.—Ps. 119:14.
2. Ki mannyer liv Apros avek Zeova pou ganny etidye?
2 Ki mannyer i pou ganny etidye: Sa kondikter pou konmans avek en lentrodiksyon bref, petet enn ou de fraz. Dan lenformasyon sa liv i pa dir ki verse Labib ki devret ganny lir alor sa kondikter pou bezwen swazir bann verse apropriye pour lir. Enn oubyen de kestyon i kapab ganny demande a lafen sak leson konman en revizyon. Si dan leson i annan sa bwat “Kestyon pour Refleksyon,” sa pou ganny servi konman revizyon. Si letan i permet sa kondikter i kapab fer lir serten sa bann verse ki’n ganny site dan sa bwat e apre demann bann kestyon siplemanter pour ankouraz lodyans pour fer komanter.
3. Anmezir ki nou pe etidye sa liv, ki nou devret fer e akoz?
3 Benefisye plennman: Prepar davans menm si ou’n deza etidye sa liv. Ler nou partisip byen, sa i anmenn louanz pour Zeova, ed nou mazin sa bann lenformasyon e i benefisye lezot dan lodyans. (Ps. 35:18; Ebr. 10:24, 25) Anmezir ou medit lo bann kalite ekstraordiner Zeova, ou pou vin pli pros avek li. (Ps. 77:11-13) An retour, ou pou pli determinen pour obeir son bann komannman e pli motive pour koz lo li avek lezot.—Ps. 150:1-6.