Imit Latitid Zezi
1. Ki latitid Zezi ti demontre?
1 Menm si nou pa’n zanmen vwar Garson Bondye, atraver bann resi lo lavi Zezi ek son minister, nou’n vreman arive kontan li. (1 Pyer 1:8) Pour kapab fer lavolonte son Papa, i ti abandonn son pozisyon eleve dan lesyel e vin lo later. Konman en imen, i ti volonterman servi lezot e donn son lavi an faver limanite. (Mat. 20:28) Parol Bondye i ankouraz nou: “Posed sa menm [latitid, NW] ki ti dan Kris-Zezi.” Ki mannyer nou kapab imit son lespri sakrifis?—Fili. 2:5-8.
2. Ki difikilte bokou Kretyen i fer fas avek, e kwa ki kapab ed zot sirmont li?
2 Ler i ti fatige: Menm si Zezi ti parfe, toudmenm i ti santi li fatige. En fwa, ler i ti “fatige” apre en vwayaz, i ti donn en temwannyaz oprofon avek en fanm Samariten. (Zan 4:6) Bokou Kretyen ozordi i rankontre menm difikilte. Apre en semenn travay byen fatigan, i kapab difisil pour trouv lafors pour partisip dan predikasyon. Me si nou fer li regilyerman, nou pou vwar ki predikasyon i rafresi nou spirityelman.—Zan 4:32-34.
3. Vi ki Zezi ti toultan pare pour ansenny lezot, ki mannyer nou kapab fer parey li?
3 Dan en lot lokazyon, Zezi ek son bann disip ti al dan en landrwa izole pour repoz en pti gin. Me en gran lafoul dimoun ti konnen e ti al rod zot. Olye ankoler, Zezi ti “touse avek konpasyon” e i ti konmans “ansenny zot bokou keksoz.” (Mark 6:30-34) I demann menm kalite latitid pour konmans e kondwir bann letid Labib. I osi demann zefor kontinyel e annan vre lanmour pour dimoun. Si pour lemoman ou pa pe kondwir en letid Labib, pa dekouraze dan ou lesey pour trouv enn.
4. Konman fer pionye asistan i kapab ed nou pour imit latitid Kris?
4 Met Keksoz spirityel premye: Fer pionye asistan i kapab ed nou pour konsantre plis lo bann keksoz spirityel. En zenn ser ti ekrir: “Manman enn mon zanmi ti ankouraz nou tou le de pour fer pionye asistan avek li pour en mwan. Mon ti vreman kontan ki nou ti zwenn ansanm avek li. Mon ti kontan pour konn bann frer ek ser pli byen, e pa bokou letan apre mon ti santi mwan tre pros avek zot. Mon ti osi kontan pour ganny bokou loportinite pour koz avek lezot lo Zeova e ansenny zot bann laverite merveye lo Rwayonm. Tou sa bann keksoz in fer mwan santi mwan pli pros avek Zeova ek son lorganizasyon.”—Ps. 34:8.
5. Akoz nou bezwen kontinyen fer zefor pour imit latitid Zezi?
5 Nou tou nou fer en lalit ant nou lekor enparfe ek nou dezir pour servi Zeova. (Rom. 7:21-23) Nou devret reziste leta lespri sa lemonn kot dimoun i konn zis zot prop lekor e pa anvi fer okenn zefor. (Mat. 16:22, 23) Zeova i kapab ed nou dan sa lalit par mwayen son lespri sen. (Gal. 5:16, 17) Anmezir ki nou esper nou delivrans dan nouvo lemonn drwat Bondye, annou imit latitid Zezi par met lentere Rwayonm ek lentere lezot avan sa ki pour nou.—Mat. 6:33; Rom. 15:1-3.