Zeova i ed bann ki met Konfyans dan li
1 Bokou dimoun i vwar larzan, pouvwar, ek bann abilite ki imen i annan konman bann fakter tre enportan pour reisi dan lavi. (Ps. 12:4; 33:16, 17; 49:6) Me bann ki annan lakrent pour Zeova e ki met zot konfyans dan li i annan sa lasirans dapre Labib ki Zeova ‘i zot sekour e zot proteksyon.’ (Ps. 115:11) Annou egzamin de laspe kot nou bezwen met konfyans dan Zeova.
2 Konman Minis Kretyen: Nou devret depan lo Bondye ler nou pe prezant bann ekspoze dan kongregasyon ouswa ler nou pe ansennyen dan predikasyon. Reflesir lo legzanp Zezi. Menm si i ti Garson Bondye, i pa ti met konfyans dan son prop lasazes ouswa abilite. Me i ti depan antyerman lo son Papa ki dan lesyel. (Zan 12:49; 14:10) Nou osi nou bezwen fer parey! (Prov. 3:5-7) Gras a lafors ki Zeova i donn nou, nou bann zefor ki ganny fer avek limilite pou onor Zeova e benefisye lezot.—Ps. 127:1, 2.
3 Nou demontre ki nou depan lo Zeova ler nou priy pour son gidans ek led son lespri sen. (Ps. 105:4; Lik 11:13) Deplis, nou met konfyans dan Bondye ler nou baz nou lansennyman lo son Parol, Labib. Son mesaz i annan sa pwisans pour tous leker e pour sanz lavi dimoun. (Ebr. 4:12) Nou glorifye Zeova ler nou servi li “avek lafors ki Bondye i donn” nou.—1 Pyer 4:11.
4 Fer fas avek Problenm: Nou bezwen osi rod led Zeova ler nou pe rankontre presyon ek problenm. (Ps. 46:1) Par egzanp, en bos i kapab ezite pour donn nou konze pour asiste en lasanble, ouswa nou kapab rankontre en sitiasyon difisil dan nou lavi fanmiy. Nou met nou konfyans dan Zeova letan nou priy li senserman e kan nou aplik gidans ki i’n donnen atraver son Parol ek son lorganizasyon. (Ps. 62:8; 119:143, 173) Ler bann serviter Zeova i fer sa, zot vwar lanmen Zeova dan zot lavi.—Ps. 37:5; 118:13, 16.
5 Zeova li menm i asir nou: “Beni sa zonm for ki met son konfyans dan Zeova, e ki Zeova in vin son lasirans.” (Zer. 17:7) Annou met nou konfyans dan li dan tou sa ki nou fer!—Ps. 146:5.