“Lobeisans anver Bondye” Lasanble Distrik Temwen Zeova 2005
1 Konman nou Gran Enstrikter, Zeova i fer laranzman pour nou rasanble e ganny enstri dan son semen. (Iza. 30:20, 21; 54:13) I fer sa atraver lesklav fidel e pridan, ki organiz sa bann renyon tel parey nou lasanble distrik annyel. (Mat. 24:45-47) Nou santi parey psalmis David, ki ti sante: “Mon pou beni Zeova parmi bann lafoul ki’n rasanble.” (Ps. 26:12) David ti konpran klerman lenportans pour ganny ansennyen par Zeova e i ti determinen pour li la parmi Son pep ler zot ti rasanble ansanm.
2 Eski ou pou parmi sa bann ki pou “rasanble” pour asiste Lasanble Distrik “Lobeisans anver Bondye” sa lannen? Si wi, sa bann lenformasyon swivan pou ed ou fer ou preparasyon pour asiste.
3 Fer plan konmela menm pour asiste tou le trwa Zour: “Bann plan sa enn ki devoue i sirman anmenn lavantaz.” (Prov. 21:5) Pa sa parol i aksantye lenportans pour fer plan san tarde pour asiste lasanble? Pour asire ki ou pa pou mank enn sa progranm spirityel ankourazan, i byen pour konmans fer tou laranzman neseser la konmela pour ou asiste tou le trwa zour. Si ou bezwen demann ou anplwayer konze, fer li toudswit. Si ou bezwen koz lo ou plan avek ou msye ouswa madanm ki pa Temwen, pa esper dernyen minit. Nenport difikilte ki ou rankontre, met zot devan Zeova dan lapriyer e annan konfyans ki avek son led “ou plan pou solidman ganny etablir.” (Prov. 16:3) Deplis, i pou byen pour ed ou bann etidyan Labib byen prepar zot pour zot kapab prezan sak sesyon.
4 Bezwen Volonter: Zezi ti kit en bon legzanp ler i ti ed lezot ki dan bezwen avek limilite. (Lik 9:12-17; Zan 13:5, 14-16) Bann ki volonter pour travay dan bann lasanble i reflekte menm leta lespri. Pour ed bann departman lasanble, Komite Lasanble pou byento envit lezot pour travay avek zot. I sirtou annan en bezwen pour bann ansyen pour volonter e aksepte bann responsabilite. Zot lespri volonter i donn en bon legzanp pour tou dimoun dan kongregasyon.—1 Pyer 5:2, 3.
5 Sa ki lezot i vwar: En manedyer lotel ti dir: “Zot nou group prefere. Zot byen konport zot konpare avek lezot group. Tou bann madanm ki okip lasanm in fer komanter lo konman zot ganny byen trete e konman zot ganny bann pti larzan. An realite, tou dimoun i anvi travay sa wikenn ki zot la!” En lot reprezantan lotel ti dir: “Bann Temwen Zeova i sa group pli fasil pour travay avek.” Petet ou bon kondwit i kontribye ver sa bann keksoz ki’n ganny dir. Mazinen konman Zeova i kontan ler i vwar nou pe azir dan en fason ki anmenn en tel louanz!—1 Pyer 2:12.
6 Atraver ‘lesklav fidel,’ Zeova in fer laranzman ki son pep i rasanble pour ganny enstri spirityelman pandan bann mwan ki pe vini. (Lik 12:42) Nou pou bezwen fer zefor pour fer preparasyon pour kapab asiste tou le trwa zour lasanble, me i pou vo lapenn. Lasanble Distrik “Lobeisans anver Bondye” pour sa lannen pou sirman fortifye nou determinasyon pour servi Zeova la konmela e pour touzour. Annou determinen pour swiv konsey sa psalmis: “Beni Bondye, Zeova, dan bann lafoul ki’n rasanble.”—Ps. 68:26.
[Bwat lo paz 3]
Ler Progranm
Vandredi ek Sanmdi
9:30 bomaten - 5:05 apremidi
Dimans
9:30 bomaten - 4:10 apremidi