“Donn Bondye Laglwar” Lasanble Distrik Temwen Zeova 2003
1 Atraver son profet fidel, Izai, Zeova ti donn sa komann: “Port latansyon, O mon pep; e ou mon kominote nasyonal, ekout mwan byen.” (Iza. 51:4) Dan sa letan lafen ki pe vin deplizanpli kritik, eski pa nou dakor ki port latansyon lo bann komannman Zeova i pli esansyel ki zanmen oparavan? Enn bann fason ki nou ‘ekout byen’ Zeova se par obeir son komannman pour rasanble ansanm pour ador li. Pa nou esper avek enpasyans sa loportinite spesyal ki nou gannyen dan nou bann lasanble distrik anyel! Konsey Direkter Temwen Zeova in ankor enn fwa aranz en lasanble distrik pour lannen 2003 isi Sesel.
2 Parey ti ganny fer resorti dan Latour Veyer le 1 Zilyet, 2002 (Angle/Franse), bann lasanble enternasyonal pou osi ganny fer dan serten pei. Bann delege sorti dan plizyer pei atraver lemonn pou asiste sa bann lasanble. Vi ki i annan en pti gin pei ki pou organiz sa bann lasanble enternasyonal, zis bann kongregasyon ki’n ganny swazir ki pou kapab asiste sa bann lasanble. Me sa menm latmosfer pou ganny resanti dan tou bann lasanble distrik. Bann misyonner pou osi prezan dan sa bann lasanble dan plizyer landrwa, e i pou annan en loportinite pour tann zot leksperyans. Ki nou kapab fer pour tir bokou byenfe dan sa bann laranzman ki pe ganny fer pour nou bann lasanble?
3 Asiste tou le trwa Zour: Pour benefisye plennman avek lenstriksyon ki ganny fourni atraver lesklav fidel e pridan, nou anvi fer sir ki nou la pour progranm an antye. (Mat. 24:45) Eski ou bezwen demann ou anplwayer zour òf pour asiste tou le trwa zour lasanble? Avan ki Neemya ti demann Lerwa Artazekses permisyon pour al Zerizalenm pour rekonstrir miray, i ti “priy avek Bondye.” (Nee. 2:4) Ou osi ou devret priy Zeova pour donn ou kouraz pour demann ou anplwayer zour òf pour asiste tou le trwa zour lasanble. Me si ou anplwayer pa oule donn ou zour òf ? Petet eksplik li ki lenstriksyon ki nou resevwar dan nou bann lasanble i ed nou pour vin bann travayer onnet, devoue, e diny konfyans. Sa i kapab ed li pour aksepte ou demann. Deplis, si nou annan manm fanmiy ki pa Temwen, i pou bon si nou enform zot konsernan nou lasanble oplivit posib.
4 Ed bann ki dan serten Bezwen: Eski i annan serten dan ou kongregasyon ki kapab bezwen led pour asiste lasanble? Bann ki aze, malad oubyen dan servis aplentan i ganny ede bokou par zot fanmiy ki Kretyen. Me bann ansyen ek lezot ki konn sitiasyon sa bann tel dimoun i kapab osi fourni lasistans avek lanmour.
5 Nou en Spektak pour Lemonn: Eski dimoun i vwar diferans ant Temwen Zeova ek sa bann ki dan lemonn? Sirman! Remark serten komanter ki bann manedyer lotel in fer dan en lavil: “Nou’n toultan annan bann tranzaksyon avek bann lasanble, me zot, zot sa bann ki’n pli byen korpere, e pli zantiy.” “Semenn pase nou ti annan en lot group larelizyon avek nou. Diferans ant zot ek sa lot group i evidan.” “Nou konnen ki nou toultan kapab depan lo zot led ek korperasyon.” Eski pa bann tel komanter i ed nou apresye lefe pozitif ki “lasazes ki sorti dan lesyel” i fer lo nou personnalite? (Zak 3:17) Vi ki nou “en spektak pour lemonn antye,” fotespere ki nou kondwit i toultan reflekte dinite ek labote manifik nou Bondye, Zeova.—1 Kor. 4:9.
6 Vi ki “lemonn konman i ete, pa pou dir lontan,” nou vreman bezwen nou bann lasanble distrik pour ed nou reste spirityelman eveye. (1 Kor. 7:31) I demann bokou zefor pour fer bann laranzman pour asiste tou le trwa zour, me i vo lapenn. Lasanble Distrik “Donn Bondye Laglwar” pour sa lannen in ganny prepare pour ed nou reste ferm anmezir ki nou esper lakonplisman zizman Zeova lo lemonn Satan. Fotespere ki nou pa les nanryen anpes nou resevwar lenstriksyon ki Zeova in prepare pour nou.—Iza. 51:4, 5.