“Bann Ansennyan Parol Bondye” Lasanble Distrik 2001 bann Temwen Zeova
1 Profet Izai ti dekrir Zeova konman sa Gran Ansennyan, ki pe ankouraz son pep zis parey en papa avek son garson: “Sa i sa semen. Mars ladan, zot lepep.” (Iza. 30:20, 21) Me konman ki nou kapab antann Zeova pe koz bann parol ki benefisye nou? Zeova i koz avek son pep atraver Labib, bann piblikasyon, bann renyon, lasanble rezyonal e distrik ki “lesklav fidel e pridan” i fourni. (Mat. 24:45, NW ) Nou kapab rekonesan anver Zeova vi ki i pe kontinyen diriz nou dan sa semen dan ki nou devret marse.
2 Sak lannen, lasanble distrik i donn nou sa loportinite pour rasanble avek nou bann konpanyon krwayan e pour ekout atantivman bann lansennyman Zeova. Lannen pase, 418 dimoun ti asiste Lasanble Distrik “Pratikan Parol Bondye.” Lannen 2001, Lasanble Distrik trwa zour “Bann Ansennyan Parol Bondye” pou ganny fer Sesel apartir le 17 ziska le 19 Out, 2001.
3 Anmezir ki lasanble distrik pe aprose, fer li en size dan ou lapriyer avek Zeova afen ki ou kapab asiste tou bann sesyon pandan sa trwa zour e retir en kantite benefis dan sa progranm. Eski ou’n demann konze dan travay pour ou kapab asiste lasanble tou le trwa zour? Si ou pa ankor, fer li oplivit posib. Normalman letan ou demann lo dernyen minit i pa souvan ki ou ganny permisyon. Sa lannen, lesklav fidel e pridan in aranze ki sa Lasanble Distrik “Bann Ansennyan Parol Bondye” i fourni nou lansennyman spirityel e batir nou lafwa. Alors, konmans plàn la konmela pour ou kapab asiste, an swivan lavertisman psalmis: “Dan bann lafoul ki rasanble, beni Bondye”!—Ps. 68:26.