Lasanble Distrik Temwen Zeova 2009
1. (a) Ki benediksyon nou pou gannyen ler nou asiste lasanble distrik tou le trwa zour? (b) Ki plan nou devret fer konmela menm?
1 Avek enpasyans, nou tou nou pe esper sa lasanble distrik ki pou ganny fer an 2009, kot nou pou ganny bann nouvo loportinite pour zwenn lezot ki pou loue Zeova ansanm avek nou e ki “konsyan zot bezwen spirityel.” (Mat. 5:3, NW) Vi ki zour Zeova pe vini a gran pa, nou ankouraz tou dimoun pour asiste lasanble tou le trwa zour pour ki zot benefisye plennman avek sa lasosyasyon frer ek ser ki demontre lanmour anver kanmarad e osi avek sa lankourazman ki pou ganny donnen pour zot reste solid dan lafwa. (Tsef. 1:14) Fer ou bann ansennyan ek anplwayer konnen ki sa lasanble i en keksoz vreman enportan dan ou ladorasyon. Annan kouraz pour fer ou plan byen boner e rod benediksyon Zeova, ou kapab asire ki i pou siport ou.—Iza. 50:10.
2. Menm si nou pa’n ganny envite pour asiste lasanble enternasyonal, ki sa menm latmosfer nou kapab ekspekte pou annan dan bann lasanble distrik?
2 Lasanble enternasyonal: Vi ki sa bann lasanble pa pou ganny fer dan bokou pei ek lavil, zis sa bann ki’n ganny aksepte ki devret asiste. Kan nou korpere avek sa laranzman, sa pou fer ki nou pa ankonbre. (1 Kor. 14:40; Ebr. 13:17) Parkont, en bon pe lasanble distrik pou annan sa menm latmosfer parey bann lasanble enternasyonal. Sa i akoz bokou misyonner, Betelit ki pe servi dan en lot pei, ansanm avek bann serviter enternasyonal, zot pou la pour asiste enn sa bann lasanble distrik dan zot pei natal.
3. Konman Kretyen, konman nou kapab demontre lanmour anver serten dan nou kongregasyon?
3 Ed lezot pour asiste: Eski i annan serten dan ou kongregasyon ki bezwen led pour asiste lasanble? Kan ou ed lezot dan sa fason, ou pa pe “pran ka zis avek [ou] prop lentere, me osi avek lentere lezot.”—Fili. 2:4.
4. Ki mannyer nou kapab ganny lenformasyon konsernan dat ek landrwa lasanble distrik?
4 Rod lenformasyon: Pour ki i annan mwens dimoun ki telefonn kot biro brans pour rod lenformasyon konsernan dat ek landrwa kot lasanble pou ganny fer, silvouple, premyerman vwar Latour Veyer le 1 Mars 2009 (Angle/Franse), oubyen sekreter dan ou kongregasyon pour bann lenformasyon ki ou bezwen.
5. Ki premye keksoz nou devret mazinen kan nou pe prepare e asiste lasanble distrik 2009?
5 Aksyon ki glorifye Bondye: Kan nou demontre fri lespri dan tou sa ki nou fer, sirtou kan nou vey lafason nou koze ek nou kondwit kan nou koz avek lezot dimoun dan lavil kot lasanble pou fer, nou pe ede ki pep Zeova i kontinyen ganny en bon repitasyon e nou pe evite fer lezot tonbe spirityelman. (1 Kor. 10:31; 2 Kor. 6:3, 4) Nou swete ki ou pou glorifye Bondye dan sa bann fason pandan sa lasanble distrik 2009 par ou prezans ek kondwit!—1 Pyer 2:12.
[Bwat]
Ler progranm:
Zedi
(Zis lasanble enternasyonal)
1:20 p.m. - 4:55 p.m.
Vandredi ek Sanmdi
9:20 a.m. - 4:55 p.m.
Dimans
9:20 a.m. - 4:00 p.m.