Lasanble distrik Temwen Zeova 2008
1. (a) Akoz konsey zapot Pol pour bann Kretyen Ebre i sirtou irzan ozordi? (Lir Ebre 10:24, 25.) (b) Ki loportinite nou pou gannyen ki pou permet nou aplik konsey Pol?
1 Zapot Pol ti ankouraz bann Kretyen Ebre pour rasanble ansanm e pour ankouraz kanmarad “sirtou” ki zot ti kapab vwar sa zour pe aprose. (Ebr. 10:24, 25) I annan plis levidans ki montre ki “sa zour” ki zapot Pol ti koz lo la i tre pros! Alors avek enpasyans nou vey bann loportinite pour rasanble ansanm avek nou bann frer ek ser pour ganny enstri spirityelman. Sa lenstriksyon spirityel i kapab gid nou dan sa bann “dernyen zour” ki pe kontinyelman vin
pli danzere. (2 Tim. 3:1) Nou pou ganny en tel loportinite dan nou lasanble distrik 2008 ki pe vini.
2. (a) Akoz i vreman enportan pour asiste tou le trwa zour lasanble? (b) Konman nou devret konmans prepar nou pour asiste lasanble?
2 Asiste tou le trwa zour: Nou ankouraz ou pour asiste tou le trwa zour. Nou pa pou mank nou nouritir spirityel ki vreman enportan si nou pa “abandonn [nou] lasanble.” (Ebr. 10:25) Konmans prepar ou osito posib. Ou kapab enform ou anplwayer boner pour ki i kapab fer okenn laranzman neseser. Si ou zanfan i annan lekol zour lasanble, enform zot ansennyan konsernan ou plan. Les zot konnen ki lasanble i form par ou ladorasyon. Ou kapab asire ki Zeova pou beni ou zefor pour met lentere Rwayonm premye.—Mat. 6:33.
3. Ki mannyer nou kapab montre konsiderasyon pour lezot?
3 Ed lezot pour asiste: Pol ti osi konsey son bann frer ek ser pour “rode konman pous kanmarad.” (Ebr. 10:24) Eski bann frer ek ser dan ou Letid Liv i bezwen lasistans pour asiste lasanble? Eski ou kapab ed ou bann letid Labib asiste lasanble avek ou, menm si zot kapab vin zis pour en zour? Ler ou enform ou fanmir ki pa krwayan konsernan ou plan pour lasanble, envit zot pour vin avek ou. Ou zefor ranpli avek lanmour i kapab anmenn bann benediksyon ki ou pa ti pe ekspekte.
4. Ki mannyer nou kapab ganny lenformasyon konsernan dat ek landrwa lasanble distrik?
4 Rod lenformasyon: Biro brans i resevwar en santenn koudtelefonn tou le-z-an kot dimoun i demande kan e kote lasanble pou ganny fer. Preski tou sa bann koudtelefonn i sorti kot bann frer ek ser ki’n fini resevwar sa lenformasyon. Nou sizere ki ou get Latour Veyer le 1 Mars 2008 (Angle/Franse) avan ou telefonn biro brans.
5. (a) Ki mannyer nou kapab glorifye Zeova ler nou asiste nou lasanble? (b) Ki komanter in ganny fer par bann travayer lotel gras a bon kondwit nou bann frer ek ser?
5 Bann bon aksyon: Ler nou obeir komannman Zeova pour rasanble ansanm pour ador li, nou menm ki benefisye. Pli enportan ankor, i donn nou loportinite pour glorifye non Zeova. (Iza. 48:17) Bokou dimoun i “fasil war bann bonn aksyon” ki nou fer kot bann lasanble distrik, e sa in motiv serten pour eksprim zot santiman. (1 Tim. 5:25) Dan en lavil kot nou lasanble in ganny fer pour plizyer lannen, en manedyer lotel ti rekonnet sa: “Bokou dimoun dan sa lavil i koz lo bann Temwen Zeova ek lenportans ki zot lasanble i annan pour nou. Nou konnen ki mannyer zot netway sant piblik, e nou vwar zot ler zot pe netway bann landrwa parking. I en plezir pour zot bann dimoun la avek nou pandan lete. Fotespere ki nou relasyon avek zot i a kontinyen dan lavenir.” Apre ki i ti’n rakont bann difikilte ki i rankontre avek lezot group ek bann artis, en manedyer lotel ti fer komanter lo lafason ki nou bann frer ek ser i korpere e demontre pasyans pandan zot sezour dan sa lotel. I ti dir: “Nou swete ki tou nou kliyan ti a parey bann Temwen Zeova!” Kondwit nou bann frer ek ser ki permet sa bann komanter ek bokou lezot ganny dir, i sirman anmenn lazwa dan leker nou Bondye, Zeova!
6. Ki mannyer Matye 4:4 i met lanfaz lo lenportans pour port byen latansyon lo sak parti progranm?
6 Zezi ti dir ki lavi i depan lo ekout “tou parol ki sorti dan labous Bondye.” (Mat. 4:4) Dan nou bann lasanble tou le-z-an, Zeova i fourni “manze [spirityel] kan i ler,” atraver “lesklav fidel e pridan.” (Mat. 24:45, NW) Bokou travay i ganny fer pour prepar e servi sa festen spirityel. Fotespere ki nou demontre nou rekonesans pour sa swen ranpli avek lanmour sorti kot Zeova par nou prezans e ler nou port byen latansyon lo sak parti progranm.
[Bwat lo paz 3]
Ler progranm:
Vandredi ek Sanmdi
9:20 a.m. - 4:55 p.m.
Dimans
9:20 a.m. – 4:00 p.m.