“Swiv Kris!” Lasanble Distrik Temwen Zeova
2007
1, 2. (a) Ki mannyer Moiz ti ankouraz bann Izraelit pour benefisye ler zot rasanble ansanm? (b) Ki bann preparasyon nou bezwen konmans fer konmela menm?
1 Moiz ti donn lord tou bann Izraelit ek rezidan etranze pour rasanble ansanm tou le set an pour ki Lalwa i ganny lir avek zot. Pour ki rezon? “Pour zot kapab ekoute e ki zot kapab aprann.” (Det. 31:10-12) Zeova ti vwar en nesesite pour rasanble son pep an gran group. Byento, pep Zeova pou rasanble pandan trwa zour Lasanble Distrik “Swiv Kris!”
2 Eski ou’n konmans fer bann preparasyon? Eski ou bezwen demann konze ou anplwayer pour asiste lasanble? Eski ou kapab ed ou etidyan Labib oubyen ou fanmiy ki pa temwen pour asiste lasanble avek ou? Eski i annan lezot dan kongregasyon ki bezwen led pour asiste lasanble? Sa bann lenformasyon swivan pou ed ou prepar ou.
3. (a) Ki profesi ki pe ganny akonpli dan Izai 25:6 ozordi? (b) Kwa ki’n ganny remarke konsernan lasistans pour lasanble dan Vandredi, e ki nou bezwen fer personnelman?
3 Asiste tou le trwa Zour: Zeova i fourni son pep avek nouritir spirityel an abondans. (Iza. 25:6) Sa i enkli sa festen spirityel ki nou gannyen dan nou bann lasanble tou le zan. I’n ganny obzerve ki dan Vandredi lasistans i bokou mwens ki bann lezot zour lasanble. Fer li ou lobzektif pour prezan tou le trwa zour sa lasanble ki lorganizasyon Zeova in prepare pour nou e ki pou redonn nou lafors. Si ou bezwen demann konze pour asiste lasanble, mansyonn sa dan ou lapriyer. Apre ‘annan sa kouraz’ neseser pour koz avek ou anplwayer deswit apre ki dat ou lasanble i ganny anonse. (1 Tesa. 2:2; Nee. 2:4, 5) I kapab ede si ou eksplike ki lasanble i form parti ou ladorasyon. Par fer sa boner i kapab fer li pli fasil pour ou anplwayer fer bann sanzman pour kapab satisfer ou demann.
4. Ki mannyer nou kapab prepar nou bann etidyan Labib ek manm fanmiy ki pa Temwen pour lasanble?
4 Prepar ou Etidyan Labib ek ou Fanmiy: Pa i pou en plezir vwar ou etidyan Labib asiste lasanble avek ou! I pou eksperyans personnelman lanmour ki ganny demontre par lasosyasyon bann frer ek ser “dan sa gran rasanbleman.” (Ps. 22:25) Enform zot byen davans pour ki zot kapab met letan dekote pour asiste. Partaz avek zot bann rezon ki fer ki ou menm personnelman ou kontan asiste lasanble. Ou kapab prepar ou bann etidyan davans lo bann keksoz ki zot ekspekte vwar par montre zot bann kaset ki montre bann lasanble, sirtou sa kaset United by Divine Teaching. Fer manm ou fanmiy ki pa temwen konn ou plan. Petet zot kapab fer laranzman pour vin vwar dram oubyen asiste omwen en zour lasanble avek ou.
5. Ki mannyer nou kapab demontre en leta lespri zenere parey i’n ganny mansyonnen dan 1 Timote 6:18?
5 Ed ou bann Frer ek Ser: Zapot Pol ti konsey bann Kretyen ki ti ris lo plan materyel “fer sa ki byen, e ki zot larises i konsist an bonn aksyon. Zot devre montre zot zenere e touzour pare pour partaz avek lezot.” (1 Tim. 6:17, 18) Nou kapab demontre sa leta lespri zenere ki Pol ti adopte si nou konsider sitiasyon bann aze ek andikape, bann ki dan servis aplentan, bann fanmiy ki annan zis en paran tousel, e petet lezot dan kongregasyon ki kapab bezwen led pour asiste lasanble. Sa responsabilite i tonm avan tou lo bann manm fanmiy ki dan laverite, me bann ansyen ek lezot i kapab montre zot bon zizman e ofer zot led si i annan en bezwen.—Gal. 6:10; 1 Tim. 5:4.
6, 7. (a) Ki bann preparasyon ki’n ganny fer pour nou avan nou ariv landrwa kot lasanble pou deroule? (b) Ki mannyer nou kapab montre nou lapresyasyon ek rekonesans pour tou bann travay ki ganny fer pour nou? (Lir Ebre 13:17.)
6 Korpere avek bann Laranzman: Ler nou ariv sa landrwa kot lasanble pou deroule, i kler ki bokou travay in ganny fer pour nou. Bann frer ranpli avek lanmour ki pe servi dan servis lakey pou swet nou labyenveni, zot pou donn nou en progranm e ed nou par endik nou kote pour asize. Bann frer ek ser in netway sa landrwa e zot in aranz en zoli lestrad. Bann travay enportan ki nou pa menm okouran in ganny akonpli pour prepar sa progranm lasanble.
7 Pour sak lasanble, en kantite dimoun in travay pour plizyer mwan pour fer bann laranzman neseser e zot fanmiy in osi kontribye par permet zot pran letan pour okip sa bann keksoz enportan. Pa nou apresye bann sakrifis ki zot in fer pour nou benefis personnel! Nou kapab montre nou rekonesans par swiv sa bann lenstriksyon dan sa lartik ek lezot gidans ki nou kapab gannyen avan lasanble. (Ebr. 13:17) Si nou tou nou korpere volonterman, sa pou fer li posib ki tou keksoz i ganny fer “byen e avek lord.”—1 Kor. 14:40.
8. (a) Akoz i sitan enportan pour pep Bondye ganny rasanble dan nou letan? (b) Kwa ki sak dimoun i kapab fer konmela menm?
8 Vi ki nou vwar “sa Zour Senyer pe aprose,” i vin pli enportan pour pep Bondye ganny rasanble. (Ebr. 10:25) Atraver nou bann lasanble, lesklav fidel e pridan, i donn nou bann lenformasyon ki ed nou pour “fer atansyon pour aplik tou bann parol sa lalwa” ki Zeova i oule nou swiv. (Det. 31:12) Fer plan konmela menm pour asiste tou le trwa zour sa lasanble Distrik “Swiv Kris!” E benefisye avek sa lenstriksyon spirityel ek sa bon lasosyasyon frer ek ser!
[Bwat lo paz 3]
Ler Progranm
Vandredi ek Sanmdi
9:20 bomaten - 5:05 apremidi
Dimans
9:20 bomaten - 4:10 apremidi