Remersi Zeova pour son Labonte Leker
Lanmor Kris pou ganny selebre le 24 Mars
1. Ki mannyer Zeova in demontre labonte leker anver nou?
1 En psalmis ti dir: “Ki dimoun i remersi Zeova pour son labonte leker e pour son bann travay merveye anver bann imen.” (Ps. 107:8) Labonte leker Bondye i plis ki zis sa lafeksyon ki i annan pour imen. Sa i ganny eklersi dan sa parol enspire: “Ou labonte leker, O Zeova, ti kontinyen soutenir mwan.” (Ps. 94:18) Pa Zeova ti demontre en labonte leker ekstraordiner ler i ti donn nou son sel Garson!—1 Zan 4:9, 10.
2. Konman nou kapab demontre nou rekonesans anver Zeova?
2 Anmezir ki Memoryal lanmor Kris i aprose, konman nou kapab remersi sa “Bondye ki demontre labonte leker”? (Ps. 59:17) Nou tou nou pou anvi met letan dekote pour reflesir lo bann dernyen zour ki Zezi ti pase lo later. (Ps. 143:5) I pou osi itil pour swiv lektir Labib spesyal pour Memoryal, parey in endike dan brosir Egzamin Labib sak Zour—2005 e, si i posib, fer lezot lektir ek resers dan sapit 112-116 dan liv Le plus grand homme ek lezot piblikasyon baze lo Labib. Pran letan pour reflesir lo bann verse ki ou lir, e met tou ou zefor ladan. (1 Tim. 4:15) Refleksyon ansanm avek lapriyer lo Parol Bondye i pa zis nouri nou leker me i osi eksprim nou lanmour pour Zeova.—Mat. 22:37.
3, 4. (a) Ki mannyer nou kapab imit leta lespri nou bann frer Liberia? (b) Lekel ou anvi envit Memoryal?
3 Ankouraz lezot pour remersi Bondye: Lannen pase, 16,760,607 dimoun ti asiste Memoryal atraver lemonn. Dan en vilaz Liberia, bann frer ti ekrir sef sa lavil, e zot ti enform li zot lentansyon pour obzerv Repa Senyer dan son lavil. Sa sef ti donn zot permisyon pour servi laplenn foutbol e i ti fer en lanons konsernan sa levennman partou dan sa landrwa pour envit dimoun asiste. Menm si ti annan zis senk proklanmater dan sa vilaz, lasistans pour Memoryal ti 636!
4 Dan menm fason, nou anvi ed bokou dimoun pour zwenn avek nou pour obzerv Memoryal. Akoz ou pa fer en lalis bann ki ou anvi envite? Sa legzanp lo dernyen paz Réveillez-vous! le 8 Mars ek Latour Veyer le 1 Avril i ofer en lenvitasyon. Ou kapab osi servi lenvitasyon Memoryal. Ekrir ler ek landrwa Memoryal lo sa papye, e kit enn avek sak dimoun ou envite. Anmezir ki le 24 Mars i aprose, telefonn sa bann dimoun pour rapel zot e finaliz bann laranzman.
5. Ki mannyer nou kapab ankouraz bann etidyan Labib pour asiste?
5 Ki mannyer nou kapab ed bann etidyan Labib ki pa ankor konmans vin renyon pour asiste e pour benefisye plennman avek sa levennman? Servi enn de minit pandan sak letid pour fer zot apresye plis lenportans sa levennman. Ou kapab vwar bann bon lenformasyon dan Latour Veyer le 15 Mars, 2004, paz 3-7 (Angle/Franse), ek liv Comment raisonner, paz 266-9 an Angle e paz 241-5 an Franse.
6. Akoz i enportan pour akey bann envite zour Memoryal?
6 Akey bann Envite: Zour Memoryal, apros bann envite e akey zot. (Rom. 12:13) Fer laranzman pour asiz obor bann ki ou’n envite, e fer sir zot annan en Labib ek en liv kantik. Nou pou sirtou anvi pran linisyativ pour akey bann frer ek ser inaktif ki’n fer zefor pour asiste. Nou lentere ranpli avek lanmour i kapab ed zot pour rekonmans asosye avek kongregasyon regilyerman. (Lik 15:3-7) Pour sa lokazyon vreman sakre, annou fer tou sa ki nou kapab pour ankouraz lezot pour zwenn avek nou pour remersi Zeova pour son “labonte leker merveye.”—Ps. 31:21.