“Kontan Zeova, zot tou ki fidel avek li”
Lanmor Zezi pou ganny obzerve le 4 Avril
1 Plizyer lannen pase, letan Likrenn ti anba sistenm Kominis, lotorite ti obzerv bann Temwen tre pre, sirtou ler Repa Senyer ti pe aprose akoz zot ti anvi konnen kote sa bann Temwen i fer zot renyon. Sa ti toultan en problenm, akoz lotorite ti konn dat apepre sa selebrasyon. Ki bann frer ti pou fer? Lakaz en ser ti annan en lakav avek delo ladan. Vi ki lotorite pa ti pou ekspekte dimoun rasanble dan sa landrwa, alor bann frer ti konstri en platform parlao sa delo ki ti ariv ziska kot zenou. Menm si zot ti bezwen asiz an maningning lo sa platform anba en plafon ba, personn pa ti deranz zot ler zot ti pe obzerv Memoryal avek lazwa.
2 Determinasyon nou bann frer an Likrenn pour obeir sa konmann pour obzerv lanmor Zezi ti en fason merveye pour demontre zot lanmour pour Bondye. (Lik 22:19; 1 Zan 5:3) Ler nou pe rankontre difikilte dan nou lavi, nou kapab ganny ankouraze avek bann legzanp koumsa e determinen pour prezan pour obzerv Repa Senyer le 4 Avril. Par fer sa, nou montre ki nou annan menm santiman avek sa psalmis ki ti sante: “Kontan Zeova, zot tou ki fidel avek li.”—Ps. 31:23.
3 Ed lezot ogmant zot Lanmour pour Bondye: Lanmour pour Bondye i pous nou pour envit lezot pour obzerv lanmor Zezi avek nou. Sipleman Nou Minister Rwayonm Fevriye in ankouraz sakenn ant nou pour fer en lalis bann dimoun ki nou anvi envite pour asiste Memoryal. Eski ou pe fer zefor pour envit tou sa dimoun ki ou’n met lo ou lalis? Pran letan pour eksplik zot lenportans sa levennman. Par rapel zot zour ek ler Memoryal e si i neseser, ofer pour akonpanny zot i kapab ankouraz zot pour asiste.
4 Zour Memoryal, fer en zefor spesyal pour akey bann ki’n aksepte nou lenvitasyon, e fer zot santi zot alez. Ki mannyer ou kapab ed zot ogmant zot lanmour pour Zeova? Pare e volonter pour reponn zot bann kestyon. Prepar ou pour ofer en letid Labib si i apropriye. Envit zot pour asiste nou bann renyon lasemenn. Bann ansyen sirtou i kapab montre lentere dan bann Kretyen inaktif ki asiste Memoryal. Zot kapab fer laranzman pour vizit sa bann inaktif e ankouraz zot pour rekonmans zot aktivite petet par revwar serten pwen ki’n ganny prezante dan diskour Memoryal.—Rom. 5:6-8.
5 Aprofondi nou Lanmour pour Zeova: Ler nou reflesir lo ranson ki en kado, i kapab aprofondi nou lanmour pour Zeova ek son Garson. (2 Kor. 5:14, 15) En Temwen ki’n asiste Memoryal pour bokou lannen ti dir: “Nou kontan asiste Memoryal. Sak lannen i vin pli spesyal pour nou. Mon rapel mwan pe debout kot lakaz mor 20 an pase, pe get mon pov papa e a sa moman, mon ti santi en profon lapresyasyon pour sa ranson. Avan mon papa ti mor, ranson ti zis en keksoz ki mon ti konnen. Mon ti konn tou bann verse ki relye avek ranson e ki mannyer pour eksplik zot! Me ler mon ti santi douler ki lanmor i anmennen, se la ki mon leker ti vreman apresye sa ki sa ranson presye pou akonpli pour nou.”—Zan 5:28, 29.
6 Anmezir ki dat Memoryal pour sa lannen i aprose, pran letan pour prepar ou leker pour sa lokazyon. (2 Kron. 19:3) Reflesir lo Lektir Labib spesyal pour Memoryal ki’n ganny mete dan Egzamin Labib sak Zour—2004 ek kalandriye 2004. Serten i kontan revwar sapit 112-16 dan liv Le plus grand homme pandan zot letid fanmiy. Lezot i fer plis resers par servi lezot liv letid ki’n ganny fourni par lesklav fidel e pridan. (Mat. 24:45-47) Nou tou nou kapab fer sa ranson vin size nou lapriyer senser. (Ps. 50:14, 23) Wi, pandan sa sezon Memoryal, annou kontinyen reflesir lo lanmour Zeova pour nou e rod bann fason pour demontre nou lanmour pour li.—Mark 12:30; 1 Zan 4:10.