Onzyenm Parti—Kondwir bann Letid Labib ki progrese
Ed bann Etidyan pour fer Retourn Vizit
1 Ler en etidyan Labib i konmans prese, i pou zwenn bann dimoun ki montre lentere dan sa bon nouvel. Ki mannyer nou kapab ed li pour fer bann bon retourn vizit e devlop lentere bann ki enterese?
2 Preparasyon pour fer en retourn vizit i konmans avek premye vizit. Ankouraz sa etidyan pour annan en lentere senser dan bann dimoun ki i koz avek. (Fili. 2:4) Ptit-a-pti form sa nouvo proklanmater pour ankouraz bann dimoun pour eksprim sa ki zot panse, pour ekout zot komanter, e pour pran not lo bann keksoz ki sa bann dimoun i enterese avek. Ler en dimoun i montre lentere, fer sa nouvo proklanmater ekrir lenformasyon enportan konsernan sa vizit. Servi sa lenformasyon pour ed li plàn lezot diskisyon plitar.
3 Preparasyon pour retournen: Reviz sa premye vizit, e montre sa etidyan konman pour swazir en laspe sa mesaz Rwayonm ki pou atir sa dimoun. (1 Kor. 9:19-23) Ansanm avek li, prepar en prezantasyon bref ki enkli en verse Labib ek en paragraf dan en liv letid. Prepar osi en kestyon ki i kapab demande alafen sa diskisyon ki pou poz fondasyon pour prosenn vizit. Montre sa nouvo proklanmater konman pour ogmant konnesans sa dimoun lo Parol Bondye apre sak vizit.
4 I osi itil pour montre sa etidyan en lentrodiksyon senp ki i kapab servi ler i pe fer en retourn vizit. Apre ki i’n dir bonzour sa dimoun, i kapab dir: “Mon ti byen kontan nou premye konversasyon, e mon’n retournen pour partaz avek ou sa ki Labib i dir lo [mansyonn sa topik].” Ou kapab osi montre sa nouvo proklanmater konman pour reazir si en lot dimoun i ouver laport.
5 Swiv Lentere avek bokou Latansyon: Ankouraz sa etidyan pour montre en bon legzanp pour retournen san tarde kot tou dimoun ki montre lentere. Pour trouv bann dimoun kot zot petet nou bezwen persiste pour retourn ankor. Ansenny sa etidyan konman pour fer bann laranzman pour retournen, e ed li konpran sa nesesite pour retournen parey i’n promet. (Mat. 5:37) Form sa nouvo proklanmater pour montre li zantiy, annan konprenezon, ek respe ler i pe rod bann ki parey mouton e devlop zot lentere.—Tit 3:2.