Montre Lentere senser—Par evite fer Lapliferans

¹ Dan en vizyon ki zapot Zan ti gannyen, i ti vwar en lanz pe anvole atraver lesyel avek en levanzil eternel pour anons “tou zabitan later, tou nasyon, tribi, lalang ek pep.” (Rev. 14:6) Eski nou osi nou swiv legzanp sa lanz par evite fer lapliferans? San ki nou realize parfwa nou latitid i kapab montre ki nou pe fer lapliferans. Nou latitid vizavi bann dimoun ki nou zwenn i kapab annan en move lefe lo lafason ki nou prezant sa bon nouvel avek zot. Alors, nou bezwen annan en lentere senser dan bann dimoun ki nou koz avek, ki pa annan menm kiltir avek nou.

² Egzamin ou Teritwar: Eski i annan bann imigran oubyen refizye ki pe reste dan ou teritwar? I fasil pour nou pa tro tro fatig nou avek zot. Pran linisyativ pour rod sa bann dimoun e esey konn zot pli byen. Esey konn zot bezwen, kwa ki konsern zot, sa ki zot kontan ek sa ki zot pa kontan, zot lenkyetid ek fo konsep. Fer tou sa ki ou kapab pour adapte ou prezantasyon dapre bezwen sak dimoun. (1 Kor. 9:19-23) Zis parey zapot Pol, nou devret santi ki nou anba en lobligasyon pour pres sa bon nouvel avek tou dimoun dan nou teritwar. Sa i enkli sa bann ki sorti dan en lot pei, bann ki annan en lot kiltir, bann ki koz en lot langaz oubyen ki ris.—Rom. 1:14, vwar osi not anba lo paz dan Traduction du monde nouveau.

³ Ki mannyer ou kapab koz avek en dimoun ki koz en lot langaz? Par byen servi sa pti liv Une bonne nouvelle pour des gens de toutes nations. Sak fwa ou al prese ou kapab anmenn avek ou bann trak ek brosir dan langaz ki dimoun i koze dan ou teritwar. (Vwar Nou Minister Rwayonm Zilyet 2003, p. 4, par. 2-3.) I annan bann proklanmater ki’n esey aprann dir bonzour oubyen en senp prezantasyon dan lezot langaz. Souvan, dimoun i sirprann kan en lot dimoun pe esey koz avek zot dan son prop langaz, menm si i pa bokou, e sa i kapab fer zot ekout sa bon nouvel.

⁴ Imit Zeova: Kan nou fer zefor pour koz avek tou dimoun, nou pe imit nou Bondye Zeova ki pa fer lapliferans, ‘ki oule ki tou [sort] dimoun i ganny sove e ganny konnesans laverite.’—1 Tim. 2:3, 4.