Kwen Kestyon

◼ Ki mannyer kantik pour konmans Lekol Minister Teokratik, Renyon Servis, Diskour Piblik, ek Letid Latour Veyer i devret ganny entrodwir, e par lekel?

Lalis bann kantik ki’n ganny swazir pour konmans Lekol Minister Teokratik pour sak semenn in ganny enkli dan Progranm Lekol Minister Teokratik dan sipleman Nou Minister Rwayonm Oktob. Kantik pour konmans e fini Renyon Servis sak semenn i ganny enkli lo paz 2 dan Nou Minister Rwayonm. Pareyman, bann limero kantik pour Letid Latour Veyer sak semenn i trouve lo paz 2 dan sak nimero Latour Veyer. Bann kantik ki’n ganny selekte i form par sa renyon e i devret alor ganny entrodwir par sa frer ki pe kondwir sa renyon, olye par tyermenn pour diskour piblik oubyen Sirveyan Lekol Minister Teokratik.

Par egzanp, sirveyan Lekol Minister Teokratik pou akey lodyans, entrodwir kantik pour konmans renyon, kondwir lekol, e apre ler lekol in fini i pou envit sa premye orater pour Renyon Servis lo platform. Sa premye orater dan Renyon Servis ki devret entrodwir sa kantik pour konmans Renyon Servis.

Dan menm fason, Diskour Piblik pou ganny entrodwir par en tyermenn. I pou akey tou dimoun dan lasistans e envit zot pour sant sa kantik ki’n ganny swazir par sa orater pour konmans renyon. Sa tyermenn (oubyen en lot frer kalifye ki’n ganny swazir davans) pou pronons lapriyer pour konmans renyon. I pou entrodwir sa orater e i pou dir tit diskour. Apre diskour, tyermenn pou eksprim an bref lapresyasyon pour sa lenstriksyon, me i pa pou fer en rezimen lo sa ki sa orater in dir. I pou anons tit diskour piblik pour semenn answit, e apre i pou envit tou dimoun dan lasistans pour reste pour Letid Latour Veyer. I pa neseser ki tyermenn i demann lodyans si zot ti pou kontan ki sa frer viziter ki’n fer diskour i anmenn salitasyon pour son kongregasyon. Apre, sa tyermenn pou envit kondikter Latour Veyer lo platform.

Kondikter Letid Latour Veyer pou entrodwir sa premye kantik ki pou ganny sante pour sa letid Latour Veyer. I pou kondwir letid an armoni avek bann lenstriksyon ki’n ganny pibliye e apre anons kantik final. Normalman, kondikter Letid Latour Veyer pou envit sa frer ki’n fer diskour piblik pour fer lapriyer.

Ler nou swiv sa bann gidans an zeneral, sa pou ede pour fer sir ki nou bann renyon i ganny fer dan en fason ini.