Pa ezite fer en letid Labib!
1. Dan ki fason nou “pa refiz sa ki byen”?
1 Kan nou partisip aktivman dan sa travay pour pres sa bon nouvel lo Rwayonm Bondye, nou pa “refiz sa ki byen” avek tou bann ki dan nou teritwar. (Prov. 3:27) Napa en pli bon mesaz pour partaz avek lezot apard ki sa mesaz lo sa bann pli bon moman ki nou pou rezwir anba dominasyon Rwayonm Bondye. Menm si ou partaz sa lespwar avek zenerozite par fer temwannyaz enformel oubyen plas bann piblikasyon, akoz ou pa fer li ou lobzektif pour kondwir en letid Labib, si ou pa pe fer li pour le moman?
2. Kwa ki kapab fer nou ezite pour kondwir en letid Labib?
2 Parler, sa pli gro lobstak pour en dimoun kondwir en letid Labib se lafason ki i santi lo sa size. Serten i ezite pour kondwir en letid akoz zot napa konfyans dan zot lekor ouswa zot annan en progranm ki byen sarze. Sa bann sizesyon ki swiv i kapab ed ou pour pa ezite pour partisip dan sa travay pour kondwir bann letid Labib.—Mat. 28:19; Akt 20:20.
3. Akoz nou kalifye pour ansenny Labib?
3 Napa konfyans: Petet ou en dimoun ki napa en ledikasyon onivo ouswa pour en rezon ouswa en lot ou napa ase konfyans dan ou abilite pour kondwir en Letid Labib. Bann Kretyen ki ti ansenny avek lefikasite dan premye syek i ti “bann zonm senp san gran ledikasyon.” Kwa ki ti ed zot pour ansenny lezot laverite? Zot ti toultan “avek Zezi.” (Akt 4:13) Zot ti aprann bokou avek Zezi sa Gran Ansennyan. Son bann metod ek lansennyman in ganny prezerve dan Labib pour nou. Menm si ou napa en ledikasyon skoler ki onivo, sa ledikasyon spirityel ki nou pe gannyen pa kapab ganny konpare avek okenn lezot.—Iza. 50:4; 2 Kor. 3:5.
4. Ki nou kapab aprann atraver legzanp Amos?
4 Parler Zeova ti servi bann profet pour reprimann bann dirizan oubyen lezot dimoun ki ti dan bann gran pozisyon. Serten parmi zot, parey Amos ti grandi dan en fanmir senp. Amos li menm ti dir “Mon pa ti en profet ni menm garson en profet, mon ti zis en gardyen zannimo e mon ti pik fig sikomor lo pye.” (Amos 7:14) Kantmenm sa, Amos pa ti per pour li al anons mesaz zizman Zeova avek Amatsya ki ti en pret e en adorater pti bef. (Amos 7:16, 17) Nou bezwen touzour mazinen ki nou pe fer travay Bondye e i pou fer nou kalifye pour sa travay ki in donn nou.—2 Tim. 3:17.
5. Akoz nou devret fer zefor pour konmans en letid Labib menm si nou progranm i sarze?
5 En progranm byen sarze: Menm si ou annan en progranm byen sarze, i kapab ki deza ou’n met letan dekote pour ou partisip dan predikasyon regilyerman. Kondwir en letid Labib i kapab enn parmi bann laspe pli enteresan dan nou minister. I en privilez pour vwar lefe ki Parol Zeova i annan dan lavi en dimoun. (Ebr. 4:12) Zeova i apresye kan nou fer bann sakrifis personnel pour ki nou kapab ed en dimoun pour “ganny konnesans laverite.” (1 Tim. 2:4) Menm bann lanz i rezwir kan en dimoun i repantir e fer bann progre spirityel.—Lik 15:10.
6. Ki privilez nou annan pour fer lavolonte Bondye?
6 Bondye i “oule ki tou dimoun i ganny sove e ganny konnesans laverite.” (1 Tim. 2:4) Pa sa i en privilez spesyal ki nou annan pour travay an armoni avek lavolonte Bondye ler nou pa ezite pour kondwir bann letid Labib!