Pa souzestim ou lekor—Trouv letan dan en progranm sarze
1. Akoz serten i ezite pour ofer en letid Labib?
1 Serten dimoun i ezite ofer en letid Labib akoz zot annan en progranm sarze. I pran bokou letan pour pran swen avek en etidyan Labib. Ou bezwen letan pour prepar letid, kondwir letid, e ed sa etidyan sirmont son bann problenm personnel. Zapot Pol ti dir ki i ti donn son prop lavi pour ed bann Tesalonisyen konn Zeova. (1 Tesa. 2:7, 8) Ki mannyer nou kapab kondwir en letid Labib menm si nou progranm i sarze?
2. Ki lefe lanmour pour Zeova pou annan lefe lo lafason ki nou servi nou letan?
2 Ador Zeova i kout nou letan: I vre ki nou bezwen bokou letan pour fer nou ladorasyon. Par egzanp, i pran letan pour asiste renyon, al predikasyon, lir Labib, e fer lapriyer. En koup marye ki byen okipe pou byen kontan fer letan pour pas avek kanmarad. Pa nou devret pli kontan ankor pour met letan de kote pour ador Zeova akoz nou kontan li? (Efe. 5:15-17; 1 Zan 5:3) Zezi ti dir ki en parti enportan nou ladorasyon se pour fer disip. (Mat. 28:19, 20) Si nou reflesir lo sa, sa pou ed nou pour pa ezite aksepte sa responsabilite pour kondwir en letid Labib.
3. Ki mannyer nou kapab pran swen avek nou bann etidyan Labib menm si nou sirkonstans i enteronp nou progranm?
3 Me ki pou arive si nou travay, problenm lasante kronik, oubyen responsabilite dan kongregasyon i enteronp nou progranm? Serten proklanmater ki tanzantan pa kapab zwenn zot etidyan i fer letid Labib atraver telefonn oubyen Internet. Bann ki zot progranm i ganny enteronpe par maladi kronik, i fer laranzman pour sa etidyan vin kot zot pour etidye Labib. Serten in fer laranzman pour ki en proklanmater ki zot kapab kont lo la i fer letid dan zot plas kan zot pa kapab.
4. Ki benediksyon nou gannyen kan nou kondwir letid Labib?
4 Pol ti ganny bokou lazwa kan i ti donn son letan ek lenerzi pour ed lezot aprann laverite. (Akt 20:35) Kan i ti reflesir lo rezilta son travay Tesalonik, son leker ti pous li pour remersi Zeova. (1 Tesa. 1:2) Nou lazwa ek satisfaksyon dan predikasyon i kapab ogmante si nou pa les nou progranm sarze anpes nou kondwir letid Labib.