Let Biro Brans

Ser proklanmater Rwayonm:

Vi ki nou pe konmans en nouvo lannen servis 2009, an bref nou kontan pour partaz avek zot rezilta bann travay ki’n ganny akonplir pandan lannen servis 2008. Nou annan tou rezon pour nou rezwir! Bann aktivite predikasyon ki ti ganny fer Mars, Avril ek Me ti vreman eksepsyonnel. Anfet, 375 pionye asistan (319 Moris, 51 Sesel e 5 Rodrig) ti zwenn ansanm avek sa 105 pionye ordiner dan nou bann zil pour fer sa travay predikasyon. Bann proklanmater osi in donn zot meyer e zot in pas en mwayenn 10 erdtan pour pres sa bon nouvel. Pandan mwan Me 2008, nou’n kondwir 2308 letid Labib (1925 Moris, 337 Sesel e 46 Rodrig).

Pandan sa bann dernyen mwan ki’n pase, diferan proze renovasyon ek konstriksyon Lasal Rwayonm in ganny fer Moris. Anfet, i ti annan travay renovasyon lo Lasal Rwayonm Beau Bassin ek Flacq. Aktyelman, dezyenm faz lo konstriksyon Lasal Rwayonm Rivière du Rampart pe ganny fer. Bann frer ki lo komite konstriksyon dan nou rezyon in fer sa travay avek bokou zenerozite e zot pe fer bokou zefor pour kapab fini sa bann proze aler. Nou vreman rekonesan anver zot. Nou osi profit sa lokazyon pour lans en rapel avek bann volonter ki ti a kontan ede pour sa gran travay renovasyon ki pou ganny fer lo Lasal Lasanble Pointe aux Sables ki pou konmanse sa mwan.

Nou ti a kontan eksprim nou rekonnesans anver tou sa bann parmi nou, ki pres sa bon nouvel e ki osi soutenir bann konstriksyon ek renovasyon bann Lasal Rwayonm dan nou rezyon. Sirman zot zefor i ganny byen apresye e sa i montre zot devouman ki zot annan anver sa Rwayonm. Reste asire ki bann proklanmater i vreman rekonesan anver zot pour zot led.

O konmansman sa lannen servis, lafanmir Betel ti a kontan dir zot ki zot vreman kontan pour travay kot a kot avek zot dan sa minister ki donn laglwar Zeova nou Bondye.

Zot bann frer,

Biro Brans Moris