Ou kapab vin en ansennyan!
1. Ki privilez sak proklanmater Rwayonm i annan?
1 Enn parmi bann laspe nou minister ki anmenn en pli gran lazwa, i kan nou ansenny en dimoun laverite. Kan nou vwar sa dimoun reazir anver mesaz Rwayonm e nou ed li vin pros avek Souvren liniver, sa i en leksperyans ki nou pa pou zanmen bliye. (Zak 4:8) Lobzektif sak proklanmater Rwayonm i devret pour ansenny en dimoun ki vreman anvi konn laverite e vwar li konmans fer bann gran sanzman dan son personnalite, pwennvi ek kondwit.—Mat. 28:19, 20.
2. Akoz serten i kapab ezite pour kondwir en letid Labib e kwa ki pou ed zot pour sirmont sa problenm?
2 Depan lo Zeova: Dan lepase, bann serviter fidel ti santi ki zot pa ti pou kapab fer sa travay ki Zeova ti’n donn zot. Moiz, Zeremi, Amos ek bann dimoun senp ti kapab sirmont bann dout ek santiman ki zot pa ti pou kapab fer sa travay enportan akoz zot ti depan lo Zeova. (Egz. 4:10-12; Zer. 1:6, 7; Amos 7:14, 15) Zapot Pol osi ti ganny sa “kouraz” oubyen “lardyes,” andotmo i ti “koz fran” avek led Bondye. Ki mannyer? I ti dir ki i ti kapab fer sa “gras a nou Bondye.” (1 Tesa. 2:2, NW, not anba lo paz.) Wi, nou tou nou kapab met nou konfyans dan Zeova pour donn nou sa led, lasazes ek lafors ki nou bezwen pour kondwir bann letid Labib efikas.—Iza. 41:10; 1 Kor. 1:26, 27; 1 Pyer 4:11.
3, 4. Ki formasyon ki disponib pour ed nou ansenny Parol Bondye?
3 Aksepte formasyon: Nou Gran Enstrikter, Zeova, i donn nou formasyon atraver en progranm ledikasyon regilye baze lo Labib pour ki nou byen prepare konman bann ansennyan. (Iza. 54:13; 2 Tim. 3:16, 17) Aksepte sa formasyon e fer tou sa ki ou kapab ler ou ganny bann loportinite pour ogmant ou konprenezon lo Lekritir e amelyor ou abilite pour ansenny laverite lo Labib. Menm si Lekol Minister Teokratik ek Renyon Servis in ganny prensipalman progranmen pour fer sa, tou lezot renyon i kapab form nou pour ansenny Parol Bondye.
4 Fer zefor pour aprann bann fason senp pour ansenny menm bann keksoz profon dan Labib. Liv Lekol Minister lo paz 227 i eksplike: “Ou menm ou devret klerman konpran ou topik si ou anvi fer lezot konpran li.” Par fer komanter dan renyon i ed nou pour gard antet bann pwen prensipal ki nou kapab servi plitar. Alor prepar byen e ou konfyans dan ou abilite pour ansennyen pou ogmante.
5. Kote nou kapab ganny plis led pour form nou pour vin bann bon ansennyan?
5 Depi o konmansman, san dout bann minis Kretyen in aprann avek kanmarad ler zot in travay ansanm dan sa travay predikasyon. (Lik 10:1) Si i posib, akonpanny bann proklanmater eksperyanse enkli bann pionye, ansyen ek sirveyan distrik oubyen rezyonal lo bann letid Labib. Obzerve ki mannyer zot servi bann legzanp senp ek lezot zouti lansennyman ki ganny trouve dan nou bann piblikasyon pour eksplik bann laverite dan Labib. Demann zot bann sizesyon lo konman ou kapab vin en pli bon ansennyan. (Prov. 1:5; 27:17) Demontre lapresyasyon pour sa formasyon ki sorti kot bann frer ek ser parski an realite i en formasyon ki sorti kot Bondye.—2 Kor. 3:5.
6. Kwa ki esansyel pour vin en ansennyan Parol Bondye?
6 Depan lo Zeova e tir byenfe atraver sa formasyon ki i donn nou. Dan ou lapriyer koz lo sa dezir ki ou annan pour progrese. (Ps. 25:4, 5) Ou osi ou kapab eksperyans sa lazwa ki ou gannyen ler ou ed en dimoun vin en ansennyan Parol Bondye!