Pa souzestim ou lekor—Sirmont sa santiman ki ou pa alaoter
1. Akoz serten i ezite ofer en letid Labib?
1 Eski ou ezite ofer en letid Labib akoz ou krwar ou napa abilite pour kondwir enn? Par fwa bann serviter fidel Bondye dan lepase, parey Moiz ek Zeremi, ti santi ki zot pa ti kalifye pour fer sa travay ki Zeova ti donn zot. (Egz. 3:10, 11; 4:10; Zer. 1:4-6) Alor, en tel santiman pa nouvo. Ki mannyer nou kapab sirmont sa santiman ki nou pa alaoter?
2. Akoz nou pa devret kontant nou avek zis pres port an port e les lezot fer letid Labib?
2 Nou devret gard antet ki Zeova pa pou zanmen demann nou pour fer en keksoz ki par lao nou abilite. (Ps. 103:14) Alor sa travay pour “fer tou pep vin . . . bann disip” e pour “ansenny zot” ki nou’n gannyen i enn ki nou kapab fer. (Mat. 28:19, 20) I en privilez ki Zeova in donn nou tou, pa zis bann ki eksperyanse oubyen talante. (1 Kor. 1:26, 27) Alor nou pa devret kontant nou avek zis pres port an port e les lezot fer letid Labib.
3. Ki mannyer Zeova i donn nou sa abilite pour kondwir en letid Labib?
3 Zeova i donn abilite: Nou abilite pour fer disip i sorti kot Zeova. (2 Kor. 3:5) Atraver son lorganizasyon, i’n ansenny nou laverite dan Labib ki ni menm bann dimoun pli edike dan lemonn pa konnen. (1 Kor. 2:7, 8) I’n prezerv bann metod ki Zezi ti servi pour ansennyen pour nou imite, e i pe kontinyen form nou atraver kongregasyon. An plis ki sa, Zeova in fourni nou zouti pour fer letid Labib. I’n donn nou bann liv parey Ki Labib i dir? ki fer laverite fasil pour konpran. Alor, lefet ki nou annan sa bann zouti, i pa difisil pour kondwir en letid Labib.
4. Akoz nou kapab annan konfyans ki Zeova pou ed nou?
4 Moiz ek Zeremi ti reisi akonpli zot travay avek led Zeova. (Egz. 4:11, 12; Zer. 1:7, 8) Nou osi nou kapab demann Zeova son led. Apre tou, ler nou kondwir en letid Labib, nou pe ansenny en dimoun laverite lo Zeova, e sa i fer Zeova plezir. (1 Zan 3:22) Alor, fer li ou lobzektif pour kondwir en letid Labib akoz i en laspe nou travay predikasyon ki anmenn bokou lazwa.