En zour spesyal pour ofer letid Labib
1 Konmansman Zanvye, sak kongregasyon pou swazir en wikenn tou lemwan, petet premye wikenn, pour konsantre lo ofer letid Labib. Sa i kapab en Sanmdi oubyen Dimans depandan zour ki pli bon lokalman. Si met lakour i refize pour aksepte en letid Labib sa zour, sa proklanmater i touzour kapab ofer sa liv Ki Labib i dir oubyen ofer dernyen nimero Latour Veyer ek Awake! Tou ansyen ek asistan ministeryel i devret fer laranzman pour partisip plennman dan sa aktivite e asiste bann proklanmater pour konmans en letid Labib.
2 Konmite Servis Kongregasyon pou deside ki zour pandan wikenn ki pou ganny swazir pour ofer letid Labib. Tanzantan bann rapel i devret ganny donnen pour ki bann proklanmater i kapab prepare e fer zefor spesyal pour ofer letid Labib dan predikasyon portanport e osi kan zot pe fer retourn vizit kot bann ki oparavan ti montre lentere.
3 Konman pour prepare: Nou kapab vwar bann sizesyon pour konmans bann letid Labib dan sipleman Nou Minister Rwayonm Zanvye 2006 e lo paz 12 dan liv Reasoning. Serten i kapab swazir pour servi en trak, parey Eski ou ti a kontan konn laverite? Nou osi kapab servi bann sizesyon pour konmans letid Labib dan Nou Minister Rwayonm Out 2007 lo paz 3 ler nou pe vizit bann ki aksepte nou magazin. Bann ansyen ek asistan ministeryel pou ganny swazir pour fer en renyon predikasyon pour 10 a 15 minit, kot enn oubyen de sizesyon pratik pou ganny diskite oubyen en demonstrasyon pou ganny fer pour montre konman pour konmans en letid Labib.
4 Byensir pa tou dimoun ki pou aksepte en letid Labib oubyen kontinyen etidye pour en bon pe letan. Sa pa devret anpes nou ofer letid Labib, vi ki se Zeova ki pe atir dimoun ki annan leker senser dan son lorganizasyon. (Zan 6:44) Nou responsabilite i pa zis pour senm lagrenn laverite me osi pour aroze, setadir kontinyen devlop lentere bann ki annan sa bon kondisyon leker par etidye Labib avek zot. Nou annan sa gran privilez pour nou travay ansanm avek Bondye ler nou ansenny lezot laverite.—1 Kor. 3:9.