‘Anons plennman Levanzil’ kan pe pres dan bann apartman
1. Ki i enplike pour ‘anons plennman Levanzil’?
1 Parey zapot Pol, nou osi nou annan sa dezir pour “anons [“plennman,” NW] Levanzil.” (Akt 20:24) Alors, nou fer bokou zefor pour pres sa mesaz Rwayonm avek otan dimoun ki nou kapab, dan nou teritwar. Sa i enkli sa kantite dimoun ki viv dan bann apartman. Parfwa, i kapab pa fasil pour ganny akse avek bann ki viv dan sa bann apartman. Me vi ki i posib ki i annan en kantite dimoun ki reste ansanm dan sak sa bann apartman, sa i fer ki nou annan en kantite sans pour partaz sa bon nouvel.
2. Akoz i enportan pour pridan e annan bon zizman kan nou pe pres dan bann apartman?
2 Vi ki nou pe viv dan en lemonn kot nenport ler i kapab annan krim ek vyolans, deplizanpli bokou apartman i take e i annan sekirite ki veye oubyen i annan bann kamera sirveyans. (2 Tim. 3:1, 2) I kapab ki sa bann ki ansarz sa apartman, in met an plas en polisi ki ou napa drwa antre dan sa apartman si ou pa’n ganny envite. Sa dimoun ki okip sa apartman oubyen en manedyer, i kapab demann nou pour kit sa propriyete, sa i kapab sirtou leka si en rezidan i fer konplent. Alors, i enportan ki nou pridan e servi bon zizman.
3. Ki ler ki pli bon pour al pres dan bann apartman e akoz?
3 Kan pou al prese: Parey i leka pour lezot teritwar, i pli byen pour pres dan bann apartman kan i annan sans ki sa bann dimoun pou se zot. Si nou al dan sa bann apartman kan laplipar dimoun pa la, sa i kapab fer dimoun sispekte ki nou pe vin fer keksoz mal. Bokou proklanmater in reisi rankontre dimoun kot zot lo tar apremidi apre ler travay, e osi Sanmdi ek Dimans apremidi. Si nou al prese dan sa bann apartman tro boner dan bomaten, sirtou dan wikenn, sa i kapab fer bann rezidan fer konplent avek sa ki okip sa apartman oubyen manedyer.
4, 5. Ki mannyer nou kapab antre dan bann apartman ki take?
4 Pour antre anndan: Pa bezwen ki bann proklanmater i kontakte sa bann ki okip apartman oubyen okenn lezot staf avan ki zot konmans pres dan sa bann apartman. Si sa bann apartman ki fermen i annan en sistenm mikrofonn an deor larantre, nou kapab servi pour ganny kontak avek en dimoun ki pou les nou antre e koz avek li. Apre ki nou’n koz avek sa dimoun ki’n les nou antre, petet nou pou kapab pres portanport dan sa bann apartman, sa pou tou depan lo kalite apartman ek sirkonstans. Me parfwa i pou pli byen si nou kit sa apartman apre ki nou’n fini koz avek sa dimoun ki ti les nou antre, e reservi sa sistenm mikrofonn pour kontakte lezot dimoun dan sa bann apartman. Nou devret annan bon zizman pour deside ki kantite dimoun nou pou kontakte dan sa fason sa menm zour.
5 Petet serten dimoun pou oule ki ou dir zot dan sa sistenm mikrofonn akoz ki ou oule vizit zot. Alors, entrodwir ou lekor dan en fason amikal. Si ou vwar non sa dimoun dan sa lalis o bor sa sistenm mikrofonn, servi son non. Dan en fason bref, dir sa ki ou ti pe vin koz lo la. Serten in ganny bon rezilta kan zot ti lir en lentrodiksyon direkteman dan liv Reasoning.
6. Ki nou devret fer ler nou pe pres dan bann apartman ki annan sekirite?
6 Si kot sa bann apartman i annan en sekirite ki pa oule les nou kontakte bann dimoun anndan, nou kapab esey pres avek li. En kantite sekirite i kontan lir nou piblikasyon. Nou menm kapab konmans en letid Labib avek li dan larantre. Si sa sekirite i les nou antre pour vizit en dimoun ki’n montre lentere, normalman i pli byen ki nou pa profit lanbeli pour al tap lezot laport dan sa bann apartman.
7. Ki nou devret gard antet an rapor avek nou sak predikasyon?
7 Nou laparans ek bon kondwit: Si nou anmenn bann sak predikasyon ki byen larz e lour, sa i kapab tant pour fer dimoun vreman remark nou. Alors, petet nou kapab anmenn en sak ki pli pti oubyen nou kapab pa anmennen. Serten proklanmater i met sa magazin ki i anvi prezante dan en fayl e anmenn zot Labib dan lanmen ouswa dan pos.
8. Ki mannyer group i devret ganny organize kan pe pres dan bann apartman?
8 I pli byen ki nou pa zwenn ansanm dan bann gran group, sirtou dan bann larantre oubyen dan landrwa parking. Akoz sa i kapab atir latansyon dimoun lo nou, ki pa neseser. Nou devret pran bann prekosyon ki apropriye kan nou pe pres dan bann apartman ki sitye dan bann landrwa kot i souvan ariv krim. (Prov. 22:3) Par egzanp, kat oubyen sis dimoun i kapab travay par per lo menm letaz, pa lwen, me a en zistans ki zot kapab tann kanmarad, petet zot kapab fer sakenn son tour sak laport an menm tan ki larestan i espere.
9. Ki mannyer nou kapab montre ki nou annan bann bon mannyer e akoz sa i enportan?
9 Kan ou antre dan bann apartman, swiy ou lipye e fer sir ki laport in byen fermen. Kan nou annan sa bann bon mannyer, bann rezidan pou ganny mwens rezon pour zot fer konplent. O moman ki ou’n antre anndan, al direkteman kot lift oubyen ver letaz ki zot pou travay, olye trenn trennen anba dan larantre. Sa pou anpes bann dimoun ki pe get nou soupsonn okenn keksoz.
10. Ki mannyer nou kapab evite fer tapaz ki pa neseser dan koridor?
10 Dan bokou apartman, ou kapab tann tapaz ziska dan koridor. Alors, pa bezwen koz tro for, me koz dan en fason ki sa dimoun i kapab byen tann ou. Kan pe koz avek lezot proklanmater, pa koz tro for, koz dan en fason kalm, pour ki nou pa fer dimoun soupsonn okenn keksoz. Pour pa tro deranz bann rezidan, serten proklanmater i konmans fer en laport dan en bout koridor lo en kote e apre zot fer en lot laport lo lot bout koridor lo lot kote, zot ale koumsa ziska ki tou laport lo sa letaz i fini ganny fer, olye ki tap sak laport enn deryer tou dilon koridor. Deplis, si nou tap laport for oubyen avek lotorite, sa i kapab fer dimoun anndan per.
11. Ki sizesyon ki kapab ede ler nou tap en laport ki annan sa pti trou ki ou kapab get dimoun ladan?
11 Si laport i annan sa pti trou ki ou kapab get dimoun ladan, debout dan en fason ki sa dimoun i kapab vwar ou ek sa enn ki pe pres avek ou. Get direkteman kot sa trou e kan ou vwar ki en dimoun pe get deor, dan en fason zantiy dir alo e konmans ou prezantasyon. Si i demande: ‘Lekel ki la?’ I kapab pli byen si ou dir ou non e osi non sa proklanmater ki avek ou. Petet apre, sa dimoun i kapab santi li pli alez pour ouver laport. Si i pa ouver, kantmenm sa ou kapab fer ou prezantasyon.
12. Konman nou kapab evite kree problenm kan nou kit piblikasyon kot nou pa’n zwenn personn?
12 Kan napa personn: En konplent ki bann ki okip bann apartman i souvan fer, se ki zot bezwen anmas bann piblikasyon dan koridor oubyen ater otour bann apartman. Bann piblikasyon ki ganny lese an deor laport i kapab fasilman tonm ater e vin konman salte. Alors, si nou kit okenn piblikasyon kot napa personn, nou devret met li dan en fason ki dimoun ki pase pa vwar.
13. Ki nou devret fer si nou zwenn en dimoun ki ankoler?
13 Kan sa dimoun i ankoler: Si nou zwenn en dimoun ki ankoler e ki paret pe al telefonn sa dimoun ki okip sa apartman, i pli byen ki nou kit sa letaz kot nou ete e retourn en lot ler. Dan lezot sityasyon i pou pli byen pour kit net sa apartman, koumsa nou pa pou bezwen ganny problenm avek sa enn ki okip sa apartman. Menm si sa dimoun pa’n dir direkteman ki i pa oule personn pas kot li ankor, i pou pli byen pour ekrir nimero sa laport e konsider li konman enn ki pa pou ganny vizite e met sa lenformasyon ansanm avek kart teritwar. Parey i leka avek lezot lakour ki pa devret ganny vizite, sa bann dimoun pou ganny kontakte tanzantan pour konnen si zot ankor annan menm pwennvi.
14, 15. Ki nou devret fer si en reprezantan sa apartman i dir nou ale?
14 Si ou ganny demande pour ale: Si kan ou pe fer bann apartman, sa enn ki okip apartman, sekirite, travayer ki fer reparasyon lo apartman, oubyen okenn lezot reprezantan sa apartman i demann ou pour ale, i byen pour ale toudswit. Otan ki posib, nou pou esey evite argimante akoz pour fini kont i kapab ki zot menase pour servi lalwa kont nou oubyen pour apel lapolis. Laplipar di tan, bann ki responsab bann apartman zot napa okenn move santiman anver nou, me zot pe zis fer zot travay.
15 Parfwa, kan en reprezantan sa apartman i demann ou pour ale, petet ou pou kapab eksplik li dan en fason kalm e avek bon zizman akoz ki ou la. (1 Pyer 3:15, NW) Nou rekonnet ki i annan sa responsabilite pour fer sir ki bann rezidan i ere e ki sa bann apartman i toultan an sekirite. Petet i pou les ou kontinyen fer sa ki ou ti pe vin fer. Si non, ale san ki ou bezwen argimante. Si i posib, ou kapab demann permisyon pour kit piblikasyon regilyerman dan larantre oubyen dan landrwa kot zot lav lenz. (Kol. 4:6) Sirveyan servis i devret reste azour avek sa bann tel sityasyon ki leve.
16. Ki nou devret fer si problenm i kontinyen kan nou pe esey fer bann apartman, oubyen plizyer blok apartman ki ansanm?
16 Petet, apre ki en serten letan ki nou kapab konsider konman rezonnab in pase, bann proklanmater i kapab esey fer sa bann apartman dan en fason pridan. Parkont si i kontinyen vin en problenm, bann ansyen i devret kontakte biro brans pour lasistans, olye les bann proklanmater esey rezourd sa sityasyon lo zot menm. Si i pa posib pour bann proklanmater fer sa bann apartman, zot kapab fer zefor pour kontakte bann rezidan par lezot mwayen, tel parey par telefonn oubyen par let. Serten proklanmater zot rann temwannyaz lo semen devan oubyen zis o bor sa apartman dan bomaten oubyen apremidi dan bann ler ki normalman dimoun i al travay oubyen pe retourn kot zot.
17. Akoz i enportan pour pres dan bann apartman?
17 Sa move sistenm i pros pour ariv ver son lafen. Zis sa bann ki kriy non Zeova ki pou ganny sove. “Me ki mannyer zot pou [“kriy,” NW] li si zot pa kwar dan li? E ki mannyer zot pou kwar dan li san ki zot in tann koz lo li?” (Rom. 10:13, 14) En kantite sa bann ki annan sa “bon kondisyon leker pour lavi eternel” i reste dan bann apartman. (Akt 13:48, NW) Kan nou pridan e annan bon zizman, nou kapab ganny sans partaz sa bon nouvel avek zot.