Ler napa Personn kot Lakour
1. Ki defi souvannfwa nou fer fas avek ler nou pe pres port-an-port?
1 Dan bokou landrwa deplizanpli, i pe vin pli difisil pour zwenn dimoun kot zot lakour. Dan sa bann “letan difisil,” bokou i bezwen travay apre ler pour esey zwenn en bout avek en lot. (2 Tim. 3:1) Serten i kapab pa kot lakour akoz zot in al aste konmisyon oubyen zot pe fer kek aktivite lwazir. Ki mannyer nou kapab arive zwenn sa bann dimoun pour partaz sa bon nouvel avek zot?
2. Ki mannyer nou kapab fer sir ki bann absan i ganny fer?
2 Gard bon Rikord: Premye letap se pour pran not bann lakaz ki napa personn. Sa i sirtou enportan si ou travay dan sa teritwar souvan. Eski ou pran not non semen, limero kart teritwar, oubyen non, ek dat? Si teritwar kot ou pe prese bann semen napa non oubyen napa kart teritwar, ou kapab desin en pti map. Ou kapab kit en lespas pour pran lezot not ler ou, oubyen en lot proklanmater i retournen pour travay sa teritwar, oubyen pour fer bann absan. Ler ou fini prese, pa bliye donn sa ki ou’n rikorde oubyen bann not avek sa enn ki responsab sa teritwar, amwen ki i dakor pour ou fer bann absan. Servi en lot papye pour mark non sa bann ki’n montre lentere ki ou pou retournen pour vwar zot.
3. Ki nou kapab fer pour zwenn sa bann ki pa kot lakour?
3 Esey en lot Ler: Petet serten ki pa kot lakour pandan letan travay i kapab kot lakour lo tar apre ler travay oubyen dan wikenn. Eski ou kapab aranz ou progranm pour ou retourn dan en ler pli konvenab? (1 Kor. 10:24) Si non ou kapab donn lalis bann absan en proklanmater ki pou kapab repase en lot ler. Si non, ou kapab ekrir bann ki pa ti kot lakour oubyen esey telefonn zot. Bann proklanmater ki zot problenm lasante i limit zot partisipasyon dan predikasyon port-an-port pou kontan pour ed ou avek sa.
4. Kwa ki montre lenportans pour repas kot bann ki pa kot lakour?
4 En leksperyans i montre lenportans pour esey ganny kontakt avek bann ki pa kot lakour. Apre ki bann proklanmater ti kontinyelman retourn kot en lakour pour trwa zan, finalman zot ti kapab kontakte sa met lakour. Zot ti dekouver ki tou sa letan sa madanm ti pe esper en Temwen pase pour li kapab repran son letid Labib parey ki i ti pe fer avan i ti sanz landrwa reste.
5. Kan ki nou kapab dir nou’n fini fer en teritwar?
5 Konplet sa Teritwar: Kan ki nou kapab dir ki nou’n fini fer en teritwar? An zeneral, sa i ler en bon zefor in ganny mete pour kontakte en dimoun kot sak lakour. Ou kapab kit en trak oubyen en vye magazin dan en fason diskre kot bann ki pa kot lakour, sirtou dan bann teritwar ki souvan pa ganny fer. Teritwar i devret ganny konplete dan kat mwan. Sa frer ki responsab pour teritwar i devret ganny enformen pour ki i kapab gard son rikord azour.
6. Akoz tou dimoun dan nou teritwar i bezwen tann sa bon nouvel?
6 Nou anvi ki otan dimoun posib i ganny en loportinite pour aprann kriy non Zeova e ganny sove. (Rom. 10:13, 14) Sa i enkli bann ki pa kot zot lakour ler nou pe pres port-an-port. Parey zapot Pol, annan sa lanvi ‘pour anons plennman Levanzil lagras Bondye.’—Akt 20:24.