Eski ou Kongregasyon i annan en gran Teritwar?
1 Toudilon teritwar ansyen Izrael depi dan bann lavil Zide ziska dan lakanpanny Galile, Zezi ti fer en predikasyon oprofon. (Mark 1:38, 39; Lik 23:5) Nou osi nou devret propaz sa bon nouvel avek otan dimoun ki nou kapab. (Mark 13:10) Sepandan, sa i kapab en defi. Akoz?
2 Serten kongregasyon i annan teritwar ki en gran parti i zis lakanpanny, bann landrwa izole dan montanny oubyen bann zil elwannyen. Bann kongregasyon ki koz lezot langaz i kapab travay dan bann gran lavil byen peple, e rod bann dimoun ki koz zot langaz. Ki nou kapab fer pour ed bann dimoun ki reste dan bann gran teritwar pour aprann laverite lo Zeova, Zezi, ek Rwayonm?
3 Plàn byen: Sirveyan servis ek sa frer ki responsab pour teritwar i bezwen sirvey zefor kongregasyon pour akonpli maksimonm benefis. Petet bann Sanmdi spesyal i kapab ganny organize kot laplipar frer ek ser i kapab dedye en lazournen antye pour prese. Ler pe travay bann teritwar ki lwen, si i posib organize pour pas plis letan sa zour dan predikasyon, e anmenn en manze pour midi. Petet ou kapab fer randevou pli boner ki labitid pour permet letan pour vwayaz ziska dan teritwar oubyen fer randevou pros avek sa landrwa ki pou ganny kouver. I kapab byen pour organiz en pti group proklanmater dan en loto pour kouver bann landrwa elwannyen, sa i ava permet ki tou dimoun i ava annan ase travay. Aranze pour travay dan bann landrwa lwen pandan bann sezon kot letan ek kondisyon semen i favorab.
4 Sa bann ki travay dan bann teritwar kot dimoun i koz lezot langaz i kapab evite perdi letan par annan en lalis azour non ek ladres sa bann dimoun ek en map resan. Organiz bann teritwar ki en group i kapab vizit tou dimoun dan en serten landrwa.
5 Fer sir ki zot pran dekwa piblikasyon. Si sa teritwar i rarman ganny kouver, i kapab apropriye pour kit trak oubyen en ansyen magazin kot bann lakaz ki napa personn. Si sa trak Eski ou ti a kontan konn plis lo Labib? i disponib dan ou langaz, ofer li avek tou dimoun ki ou rankontre e kit enn kot bann lakaz ki napa personn.
6 Korpere plennman: Travay dan en gran teritwar i demann korperasyon tou dimoun dan kongregasyon. Kot zot bezwen vwayaz bokou dan en transpor, sa bann ki pe vwayaz ansanm i kapab kontribye pour bennzin. Demontre en bon zizman ler ou trouv en dimoun ki pare pour koze. Pa oubliye ki ou bezwen koz avek tou dimoun dan sa teritwar, e pran an konsiderasyon sa bann ki pe esper ou. Si ou deside pour fer en gran konversasyon avek en dimoun ki enterese, fer laranzman ki larestan group i kontinyen prese.
7 Fer bann laranzman konkret pour revizit tou bann ki’n demontre lentere. Apard ki ladres, esey ganny nimero telefonn sa dimoun enterese afen ki ou kapab kontakte li e donn en temwannyaz par telefonn. Si bann semen lakanpanny napa non oubyen nimero, desin en map oubyen dekrir konman pour trouv sa dimoun enterese ler ou fer retourn vizit.
8 I vreman en gran privilez ki nou annan pour akonpli lenstriksyon Zezi: “Kan zot ariv dan en lavil oubyen en vilaz, rode ki sennla ki pare pour resevwar zot”! (Mat. 10:11) Sirman Zeova pou beni ou zefor pandan ki ou volonterman ofer ou lekor dan sa travay ki anmenn bokou rekonpans!