Ansenny dan en fason senp
1. Ki sa laspe enportan ki fer nou lansennyman kler e efikas?
1 Pour nou lansennyman efikas, i vreman enportan ki nou ansenny dan en fason senp. Kan nou egzamin lafason Zezi, sa Gran Ansennyan ti ansennyen, sa i kapab ed nou amelyor nou “lar pour ansennyen.”—2 Tim. 4:2, NW; Zan 13:13.
2. Kwa ki enplike kan nou pe ansenny dan en fason senp e ki lefe ansenny dan sa fason i annan?
2 Koz dan en fason senp: Nou kapab trouv serten parmi bann laverite pli o profon ki okenn zonm pa’n deza koz lo la dan Sermon lo montanny. Tou ti ganny dir dan en fason byen senp. (Mat., sapit 5-7) Sa lafoul ki ti pe ekout Zezi ti “etonnen par mannyer ki i ti ansennyen.” Bann zofisye ki ti ganny anvoye pour aret li ti santi zot pouse pour dir: “Personn pa’n zanmen deza koz parey sa zonm.” (Mat. 7:28, 29; Zan 7:46) Nou pa bezwen servi bann mo enpresyonan, bann fraz konplike oubyen legzanp detaye pour fer lezot konvenki ki sa ki nou pe ansenny zot i vreman laverite. Laverite i kapab klerman ganny eksplike par servi bann term ki nou servi dan lavi tou le zour.
3. Akoz ki serten i kapab tant pour donn zot lodyans tro bokou lenformasyon e ki mannyer zot kapab evite fer sa?
3 Deside ki kantite lenformasyon ou pou donnen: Pour deside ki kantite lenformasyon i ti pou donnen a la fwa, Zezi ti pran an konsiderasyon son lodyans. (Zan 16:12) Nou bezwen obzerve pour vwar ki kantite lenformasyon ki nou pou donn avek bann ki nou koz avek e adapte avek zot bezwen, espesyalman kan nou pe rann temwannyaz avek nou fanmir, bann nouvo, oubyen zanfan. Nou devret fer atansyon pour pa donn zot tro bokou lenformasyon, menm kan i paret ki zot pe ekout atantivman. Bann ki annan leker senser pou kontinyen aprann konn sa vre Bondye, Zeova.—Zan 17:3; 1 Kor. 3:6.
4. Akoz i anmenn byenfe kan nou konsantre lo bann pwen prensipal olye bann detay?
4 Konsantre lo bann pwen prensipal: Zezi pa ti fer son lansennyman vin pli konplike par enkli tro bokou detay. Kan i ti dir: “Tou bann mor ki dan tonbo pou . . . sorti dan zot tonbo,” i pa ti lemoman pour donn detay lo lespwar sa de group dimoun ki pou ganny resisite. (Zan 5:28, 29) Kan nou pe kondwir letid Labib, nou devret konsantre lo bann pwen prensipal e evite donn bann lenformasyon ki pa neseser, ki pa pe ganny diskite dan sa piblikasyon.
5. Ki benediksyon nou kapab gannyen si nou ansenny dan en fason senp?
5 Pa nou vreman rekonesan ki Zeova in ansenny nou tou sa ki nou bezwen konnen dan en fason senp! (Mat. 11:25) Fotespere ki nou osi nou fer en kantite zefor pour ansenny dan en fason senp, sa pou fer nou minister vin prodiktif e nou pou ganny lazwa.