Trwa sizesyon pour amelyor ou fason ansennyen
1. Akoz nou devret amelyor nou fason ansennyen?
1 Tou proklanmater i en ansenyan. Ki swa nou pe vizit en dimoun pour premye fwa, retournen pour pourswiv son lentere ouswa nou pe kondwir en letid Labib, nou pe pas bann lenformasyon. Sa lenformasyon ki nou ansennyen i enn spesyal. Nou pe ed lezot pour konpran “Lekritir sakre” e sa i kapab ed sa bann dimoun pour annan “lasazes ki kondir dan lavi eternel.” (2 Tim. 3:15) I en gran privilez sa, pa i vre! Annou vwar trwa sizesyon ki pou ed nou amelyor nou fason ansennyen.
2. Ki mannyer nou kapab ansenny dan en fason senp?
2 Gard li senp: Ler nou konn en size byen, i kapab fasil pour oubliye ki sa menm size i kapab difisil pour lezot konpran. Pour sa rezon, ler ou pe etidye Labib avek en dimoun, pa bezwen bonbard li avek en ta lenformasyon ki pa neseser. O kontrer, konsantre lo bann pwen prensipal. Koz en kantite pa vedir ki nou pe ansenny dan en bon fason. (Prov. 10:19) An zeneral, i pli bon pour lir bann verse enportan. Apre ki ou’n lir en verse Labib, konsantre lo sa bout dan sa verse ki relye avek sa size. Dan Sermon lo Montanny dan Matye sapit 5 a 7 i annan bann lansennyman vreman profon. Me pourtan, Zezi pa ti servi en kantite parol e i ti ansenny dan en fason senp.
3. Akoz i bon servi legzanp e ki kalite legzamp ki pli bon nou servi?
3 Servi bann legzanp: Bann legzanp ki ganny servi dan lansennyman i kapab fer nou reflesir, tous nou leker e ed nou rapel sa bann lide. Ou pa bezwen rakont bann gran zistwar. Souvandfwa, Zezi ti servi bann pti legzanp senp. (Mat. 7:3-5; 18:2-4) Bann pti desen senp lo en bout papye i kapab itil. Si ou reflesir davans ou kapab mazin bann legzanp efikas.
4. Ki mannyer nou kapab servi bann kestyon dan en fason efikas?
4 Servi kestyon: Bann kestyon i ed ou etidyan reflesir. Alor, ler ou demann en kestyon, donn li ase letan pour reponn. Si ou deswit reponn dan son plas, ou pa pou vreman konnen si i konpran. Si son larepons i mal, olye koriz li, i ti a pli bon si ou fer li reflesir an servan lezot kestyon ziska ki i ariv lo sa bon konklizyon. (Mat. 17:24-27) Napa personn ki ansenny dan en fason parfe. Sanmenm ki Labib i ankouraz nou pour fer byen atansyon nou lansennyman. Si nou fer sa, nou ava anmenn bann benediksyon pour nou lekor e pour bann ki ekout nou.—1 Tim. 4:16.