Servi byen nou bann piblikasyon
1. Ki mannyer nou kapab imit lafason ki Zezi ti demontre lapresyasyon pour bann provizyon ki Zeova i donn nou?
1 Apre ki Zezi ti fer en mirak kot i ti nouri en gran lafoul dimoun, i ti fer laranzman pour anmas manze ki ti reste. (Mat. 14:19-21) Lafason ki Zezi ti demontre lapresyasyon pour provizyon ki Zeova ti donn zot i en bon legzanp pour nou swiv. Nou kapab demontre nou “rekonesans” par servi byen tou sa ki Zeova i donn nou atraver “lesklav fidel e pridan.”—Kol. 3:15; Mat. 24:45-47, NW; Lik 12:42.
2. Ki mannyer nou kapab evite akimil magazin?
2 Magazin: Magazin i kapab fasilman akimile. Si souvan nou annan bann magazin anplis ki reste kot nou, nou devret redwir lakantite ki nou rekomande. Me konsernan nou bann vye magazin? Sa bann magazin pa perdi zot valer avek letan. Si nou annan en kantite vye magazin ki’n akimile, petet sirveyan servis oubyen en lot ansyen i kapab ed nou pour rod bann fason efikas pour nou plas zot.
3, 4. Ki pwen nou devret gard antet kan nou pran bann piblikasyon kot Lasal Rwayonm?
3 Lezot piblikasyon: Kan en diferan piblikasyon pe ganny ofer, verifye avan pour vwar si ou deza annan sa piblikasyon kot ou avan ki ou al rod ankor kot Lasal Rwayonm. Fer sir ki ou pran zis lakantite piblikasyon ki ou pou bezwen pour sa semenn e apre ki ou’n fini plas zot ou kapab al rod ankor lo kontwar.
4 Konsernan bann piblikasyon pour ou servi personnelman, rekomann zis sa ki ou vreman bezwen pour lemoman. Ekrir ou non dan sa lespas vid. Sa pou ed ou retrouv ou kopi personnel si ou perdi li. Si ou servi Watchtower Library lo CD-ROM e ou’n gard ou kopi personnel sa bann magazin, ou kapab santi ki ou pa bezwen rekomann kopi personnel bann volim Latour Veyer ek Awake!
5. Ki nou devret gard antet kan nou pe plas nou bann piblikasyon?
5 Plas bann piblikasyon: Nou devret fer zefor pour plas nou bann piblikasyon selman avek bann dimoun ki annan en lentere senser. Gard antet ki premyerman se nou ki responsab pour kouver depans sa bann zouti ki annan valer ki nou servi dan nou minister. Kan nou pe kit en piblikasyon avek bann dimoun ki enterese, pa ezite pour enform zot konsernan sa loportinite ki zot annan pour siport sa travay mondyal par fer kontribisyon.
6. Akoz nou bann piblikasyon i vreman presye e ki sa pou pous nou pour fer avek zot?
6 Zezi ti fer mirak pour fourni manze pour lezot, me pli souvan i ti nouri bann dimoun spirityelman. Zezi ti dir: “Zonm pa viv zis lo dipen tousel me lo tou parol ki sorti dan labous Bondye.” (Mat. 4:4) Nou bann piblikasyon i ansenny laverite dan Labib ki vreman enportan pour ganny lavi eternel. (Zan 17:3) Zot tro presye pour nou gaspiy zot!