Eski ou pe toultan anvoye?

Anvoy kwa? Pour ranpli sa kart DPA (Advance Decision to Refuse Medical Treatment) pour Temwen Zeova ki’n batize. Vi ki ou pa ‘konnen mannyer lavi pou ete demen,’ i tre enportan ki ou desid davans e met an ekrir ki kalite tretman ek prosedir ou pou aksepte dan en ka irzan. (Zak 4:14; Akt 15:28, 29) Pour ed ou fer sa, i annan sa video ­Transfusion-Alternative ­Health Care—Meeting Patient Needs and Rights. Apre ki ou’n priy lo la, revwar sa video e servi sa bann kestyon ki swiv pour ed ou vwar sa ki ou’n aprann.—Not: Vi ki sa video i annan bann senn kot pe montre loperasyon, bann paran i devret servi bon zizman ler zot pe get sa video avek zot zanfan.

(1) Akoz serten dokter ek lezot dimoun ki travay dan lasante pe egzaminen si zot devret kontinyen servi transfizyon disan parey oparavan? (2) Donn trwa legzanp bann loperasyon konplike ki ti ganny fer san transfizyon disan. (3) Ki kantite dokter ek sirizyen atraver lemonn ki’n montre ki zot pare pour tret bann pasyan san servi disan? Akoz zot pare pour fer sa? (4) Ki bann dernyen letid ki’n ganny fer dan bann lopital i montre konsernan servi disan? (5) Ki danze transfizyon disan i kapab anmennen pour lasante en dimoun? (6) Ki konklizyon bokou eksper in tonm lo la konsernan byenfe bann tretman ki kapab ganny servi dan plas transfizyon disan? (7) Kwa ki fer en dimoun ganny lannemi? Ziska ki degre imen i kapab siport lannemi san annan bann move lefe? Kwa ki kapab ganny fer pour anpes sa? (8) Ki mannyer pasyan i kapab prodwir plis globil rouz? (9) Ki metod ki ganny servi pour limit lakantite disan ki perdi pandan loperasyon? (10) Eski bann tretman ki ranplas transfizyon disan i osi efikas pour bann zanfan oubyen pour bann dimoun ki zot lavi i an danze? (11) Ki bann dokter i bezwen pran an konsiderasyon an sa ki konsern drwa bann pasyan? (12) Akoz i vreman enportan pour bann Kretyen swazir davans ki kalite tretman, parmi bann ki ranplas transfizyon disan, zot pou aksepte dan plas fer transfizyon disan? Ki mannyer nou kapab fer sa?

Sak dimoun i fer son prop desizyon si i pou aksepte okenn tretman dan sa video dapre son konsyans ki ganny gide par Labib. Eski ou’n fini deside ki prosedir ek tretman medikal ou pare pour aksepte pour ou ek ou zanfan epi ranpli sa kart DPA? Pour ganny plis lenformasyon lo sa size, pran letan pour revwar liv “Lanmour Bondye” sapit 7 enkli sa bann referans ki ganny mansyonnen ladan. Vwar osi sa sipleman dan Nou Minister Rwayonm Novanm 2006 entitile: “Ki desizyon mon pran konsernan bann fraksyon disan ek bann prosedir medikal ki enplik mon prop disan?” Finalman, fer sir ki ou’n ekrir ou bann swa ki ou’n desid lo la dan ou kart DPA. Ou klinik ek ou bann manm fanmir ki pa Temwen i devret ganny enformen konsernan ou desizyon.

[Bwat lo paz 7]

• Eski ou’n ariv lo en desizyon ferm lo ki prosedir ek tretman medikal ou pare pour aksepte pour ou ek ou zanfan?

• Eski ou kart DPA byen ranpli i toultan avek ou an ka i ariv en ka irzan?