Eski ou konn byen ou bann opsyon?
Bokou plis lopital dan lemonn pe fer loperasyon san servi disan. Eski ou vreman konn byen bann diferan opsyon ki annan ki pa servi disan? I enportan ki ou konn byen tousala ler ou fer desizyon ki enplik sa bann tretman ek loperasyon. Pour ed ou, i byen si ou get sa video No Blood—Medicine Meets the Challenge. Apre, ou kapab priye e revwar sa ki ou’n aprann par servi sa bann kestyon pli ba.—Not: Dan sa video i annan bann pti bout ki montre kot loperasyon pe ganny fer, alors bann paran i devret servi bon zizman kan zot pe get sa video avek zot zanfan.
(1) Ki sa rezon prensipal akoz bann Temwen Zeova i refiz transfizyon disan? (2) Konsernan swen medikal kwa ki bann Temwen Zeova i swete? (3) Ki drwa enportan bann pasyan i annan? (4) Akoz i rezonnab e nou responsab ler nou swazir lezot tretman ki ranplas transfizyon disan? (5) Ler en dimoun i perdi en kantite disan, ki sa de priyorite irzan bann dokter i annan? (6) Ki sa kat diferan metod prensipal ki kapab ganny servi pour ranplas transfizyon disan? (7) Ki mannyer bann dokter i kapab (a) limit lakantite disan ki perdi, (b) konserv bann selil rouz, (c) ogmant prodiksyon disan, e (d) rekiper disan ki’n perdi? (8) Dekrir sa prosedir ki ganny apele (a) hemodilution ek (b) cell salvage. (9) Lo kwa nou devret ganny enformen an rapor avek lezot tretman ki ranplas transfizyon disan? (10) Eski bann gran loperasyon ek bann ki konplike i kapab ganny fer san transfizyon disan? (11) Ki bann devlopman ki anmenn benefis ki pe ganny fer dan domenn medikal?
En dimoun i fer son prop desizyon dapre son konsyans baze lo Labib si i pou aksepte okenn tretman dan sa video. Eski ou’n fini deside ki tretman ek prosedir ki ou pou aksepte pour ou menm e pour ou zanfan, e apre ranpli sa kart DPA? Si ou oule ganny lenformasyon detaye lo sa bann size, avek bokou latansyon revwar “Kestyon lekter” dan Latour Veyer (Angle/Franse) le 15 Zen 2004 ek le 15 Oktob 2000. Apre servi sa de kestyonner dan Nou Minister Rwayonm Novanm 2006, ki annan pour tit: “Ki desizyon mon pou pran konsernan bann fraksyon disan ek bann prosedir medikal ki enplik mon prop disan?” Sa pou ed ou fer ou prop desizyon konsernan bann opsyon ki ou pou aksepte oubyen non. Finalman, fer sir ki ou’n byen ekrir ou bann swa lo sa kart DPA. Sa dimoun ki devret ganny kontakte dan ka irzans e nenport ki dan ou fanmir ki pa Temwen Zeova, i devret konn byen ou desizyon.
• Eski ou’n deside ki kalite tretman medikal ek prosedir ki ou pare pour aksepte pour ou menm e pour ou zanfan?
• Eski partou kot ou ale ou annan en kart DPA ki’n byen ranpli an ka irzans?