En temwannyaz pwisan pou ganny donnen
1. An plis ki sa diskour, kwa ankor ki kapab enpresyonn bann viziter? Eksplike.
1 Kan ki sa temwannyaz pou ganny donnen? Zour Memoryal. I’n annan bokou zefor ki’n ganny fer pour envit bann dimoun pour asiste Memoryal ansanm avek nou. Pa zis sa ki bann viziter pou tande ki kapab enpresyonn zot. En madanm ki ti asiste Memoryal ti spesifikman fer komanter lo sa ki i ti vwar, lo lafason ki tou dimoun ti zantiy e demontre lentere anver kanmarad e sa batiman prop ki’n ganny konstri e byen mentenir par bann volonter. Alor, nou tou nou ede pour donn en temwannyaz pandan sa lokazyon spesyal dan lannen, pa zis sa orater.—Efe. 4:16.
2. Ki mannyer sakenn ant nou i kapab donn en temwannyaz bann viziter?
2 Donn bann viziter en bon lakey: Par dir zot bonswar avek en zoli sourir e avek bokou lazwa, sa pou ede pour donn en temwannyaz. (Zan 13:35) Menm si i pa posib pour koz avek tou dimoun, ou pou kapab entrodwir ou lekor avek bann ki pros o bor ou. (Ebr. 13:1, 2) Gete si ou remark okenn dimoun ki paret pa konn personn dan lasal. I tre posib ki zot in ganny envite atraver sa kanpanny lenvitasyon. Ou kapab demann zot: “Eski premye fwa ki ou vini?” Envit zot pour asiz avek ou e dir zot ki ou ti pou kontan reponn nenport kestyon ki zot kapab annan. Si ou kongregasyon i bezwen kit sa landrwa deswit apre Memoryal pour ki en lot kongregasyon i kapab servi sa landrwa, ou kapab dir: “Mon ti pou kontan konnen ki ou panse lo sa ki ou’n tande e vwar. Eski i annan okenn fason ki mon kapab kontakte ou?”
3. Ki mannyer nou kapab akey bann ki inaktif?
3 Akey bann ki inaktif: San dout i pou annan bann proklanmater inaktif ki pou asiste Memoryal enkli bann ki pa vin ditou renyon me ki asiste Memoryal tou le lannen. Akey zot e fer zot konnen ki ou vreman kontan pour vwar zot. (Rom. 15:7) Bann ansyen i kapab al vizit zot zis apre Memoryal pour ankouraz zot pour kontinyen asosye avek kongregasyon. Annou fer li en size dan nou lapriyer ki bann ki asiste Memoryal i ganny pouse pour rann glwar Bondye, pa zis akoz sa ki zot in tande me osi akoz zot in ‘rekonnet nou bonn aksyon.’—1 Pyer 2:12.