Akey zot byen!
1. Ki lokazyon ki donn nou en bon loportinite pour rann en bon temwannyaz e akoz?
1 Napa en lot lokazyon ki kapab donn nou en pli bon loportinite pour rann temwannyaz ki nou Memoryal ki ganny fer tou le-z-an. Par egzanp: Sa lannen i sipoze annan apepre dis milyon viziter ki pou asiste Memoryal e ekout en diskour lo lafason ki Zeova ek Zezi in demontre bokou lanmour atraver sa ranson. (Zan 3:16; 15:13) Zot pou aprann konsernan sa bann benediksyon ki zot kapab gannyen atraver sakrifis Zezi. (Iza. 65:21-23) Par kont, sa orater i pa sa sel dimoun ki pou ganny lokazyon rann temwannyaz sa zour. Tou sa ki dan lasistans pou annan en loportinite pour donn en bon temwannyaz par byen akey bann viziter.—Rom. 15:7.
2. Ki mannyer nou kapab akey byen nou bann viziter?
2 Dan plas rod en plas asize e esper progranm konmanse, akoz ou pa pran linisyativ pour entrodwir ou avek lezot dimoun? Bann viziter i kapab timid e pa konnen ki pour fer. Ler nou dir zot bonzour avek en zoli sourir, sa pou ed zot santi zot alez. Pour konnen si en dimoun in ganny en lenvitasyon oubyen non, ou kapab zis demann li si premye fwa ki i vin nou renyon oubyen si i konn okenn dimoun dan lasal. An plis, ou kapab envit li pour asiz o bor ou e swiv bann verse Labib ek kantik ansanm. Si Memoryal pe ganny fer dan Lasal Rwayonm, ou kapab fer li vizite. Apre diskour, fer sir ki ou fer letan pour reponn son bann kestyon. Si ou kongregasyon i bezwen kit sa lasal deswit pour kit plas pour en lot kongregasyon, ou kapab dir sa envite: “Mon ti a kontan konnen ki ou’n panse lo sa progranm. Eski i annan en fason pour kontakte ou?” Apre fer laranzman pour revwar li. Bann ansyen pou kontan ankouraz bann proklanmater inaktif ki’n asiste Memoryal.
3. Akoz i enportan pour pran linisyativ pour akey bann viziter pour Memoryal?
3 Pour bokou viziter, sa pou premye fwa ki zot vwar sa lazwa, lape ek linite ki pep Bondye i eksperyanse dan sa paradi spirityel. (Ps. 29:11; Iza. 11:6-9; 65:13, 14) Ki bann viziter pou mazinen apre Memoryal? Sa pou depan lo si nou pran sa linisyativ pour akey zot byen.