Pour en lagrenn pouse i bezwen ganny aroze
1. Kwa ki nou bezwen aroze pour li pouse?
1 Pour en lagrenn pouse i bezwen ganny aroze. I menm parey avek lagrenn laverite ki ganny plante dan leker bann dimoun dan nou teritwar. (1 Kor. 3:6) Nou bezwen fer bann retourn vizit e aroz sa lagrenn senbolik avek Parol Bondye si nou anvi i pran rasin, pouse e raport fri.
2. Ki nou devret fer pour ganny en retourn vizit?
2 Demann en kestyon: Kan ou pe prepar ou prezantasyon, akoz ou pa osi rod en kestyon ki pou evey lentere sa dimoun ki ou pou kapab reponn ler ou fer sa retourn vizit? Demann sa dimoun sa kestyon ver lafen sa konversasyon e fikse en zour pour retourn kot li. Bokou in vwar li pli fasil pour swazir en size dan liv Ki Labib i dir ki pou donn zot sa loportinite pour montre ki mannyer nou fer en letid Labib.
3. Ki lenformasyon ou kapab note kan ou zwenn en dimoun ki enterese?
3 Pran bann not: Dek ki ou kit lakour sa dimoun, pran detrwa minit pour not tou sa ki ou’n koz lo la avek li. Ekrir non sa dimoun ek son ladres. I pou bon si ou ekrir dat ek ler ki ou ti koz avek li, sa ki ou ti koz lo la e si ou ti kit en piblikasyon avek li not sa osi. Eski i asosye avek en larelizyon? Eski i annan en fanmir? Eski i ti dir ou kwa ki i enterese e santi li konsernen avek? Sa bann lenformasyon pou ed ou pour konnen kwa ki ou pou koz lo la kan ou retourn kot li. Ou osi kapab ekrir zour ek ler ki ou’n fikse pour retournen e sa kestyon ki ou ti’n kit avek li.
4. Akoz nou bezwen persevere kan nou pe fer retourn vizit?
4 Persevere: Satan pa pou zanmen aret “aras Laparol” ki’n ganny plante dan leker en dimoun. (Mark 4:14, 15) Alor, pa bezwen dekouraze si ou vwar li difisil pour revwar sa dimoun ki’n demontre lentere kot lakour. Petet ou kapab ekrir li en let oubyen met en not anba son laport. En ser pionye ti konmans en letid Labib devan laport avek en madanm me apre sa i pa ti vwar li ankor kot lakour, alor i ti ekrir li en let. Avek letan, sa ser ti zwenn sa madanm kot lakour ankor. Sa madanm ti eksprim son gran lapresyasyon pour lentere ki sa ser ti’n demontre anver li. Anmezir ki nou aroz lagrenn laverite, nou pou eksperyans lazwa ki en dimoun i gannyen ler i vwar sa lagrenn bourzonnen, grandi e “raport bann fri, i annan trant, i annan swasant e i annan san.”—Mark 4:20.