Servi en lapros ki efikas
1. Ki nou kapab aprann atraver bann diferan lapros ki bann Kretyen dan premye syek ti servi?
1 Bann Kretyen dan premye syek ti anons sa bon nouvel avek dimoun sorti dan diferan kiltir ek larelizyon. (Kol. 1:23) Menm si zot ti pe anons menm mesaz, setadir Rwayonm Bondye, zot ti servi diferan lapros dapre lodyans. Par egzanp, ler Pyer ti koz avek bann Zwif ki ti annan en profon respe pour Lekritir, i ti konmans par sit parol profet Yoel. (Akt 2:14-17) De lot kote, remark lafason ki Pol ti rezonn avek bann Grek dan Akt 17:22-31. Dan nou letan osi, dimoun dan serten teritwar i annan respe pour Labib e sa i fer li fasil pour nou servi Labib ler nou pe pres portanport. Par kont, nou bezwen pli pridan ler nou pe koz avek bann ki pa enterese avek Labib oubyen larelizyon ouswa bann ki asosye avek en larelizyon ki pa Kretyen.
2. Ki mannyer nou kapab servi bann piblikasyon ki pou ganny ofer pour ed bann ki respekte Labib ensi ki bann ki pa respekte Labib?
2 Servi byen bann piblikasyon ki ganny ofer: Pour sa lannen servis, piblikasyon ki pou ganny ofer pou sanze tou le de mwan. Sa pou enkli plis bann magazin, trak ek brosir. Menm si bann dimoun dan nou teritwar pa enterese avek Labib, nou kapab prezant zot en piblikasyon ki pou enteres zot. Petet nou pa pou ganny sans lir en verse Labib lo premye vizit oubyen mansyonn Labib direkteman, me ler en dimoun i demontre lentere, nou kapab retournen avek bi pour ed li batir lafwa dan en Kreater ek son Parol enspire. De lot kote, si nou pe pres dan en landrwa kot dimoun i respekte Labib, nou kapab servi bann piblikasyon ek en prezantasyon apropriye. Anfet, menm si nou pe ofer lezot piblikasyon pour sa mwan, nou kapab ofer liv Ki Labib i dir? oubyen Listen to God ouswa Ekout Bondye e viv pour touzour nenport ler. Sa ki enportan se ki nou servi en lapros ki efikas.
3. Dan ki fason leker dimoun dan nou teritwar i parey later?
3 Prepar later: Leker en dimoun i parey later. (Lik 8:15) Serten later i bezwen plis preparasyon avan ler bann lagrenn laverite ki dan Labib i kapab pran rasin e pouse. Bann predikater dan premye syek ti reisi plant dan diferan later e zot ti ganny bokou lazwa ek satisfaksyon. (Akt 13:48, 52) Nou osi kapab eksperyans menm lazwa si nou vey byen nou lapros.