“Viv anpe avek tou dimoun”
1. Ki konsey Labib nou devret aplike kan en met lakour i ankoler?
1 Pep Zeova i bann dimoun ki kontan lape, e dan predikasyon nou anons en mesaz lape. (Iza. 52:7) Parler nou zwenn bann dimoun ki ankoler akoz nou’n vin pres kot zot. Kwa ki kapab ed nou gard lape dan en tel sityasyon?—Rom. 12:18.
2. Akoz i enportan pour konpran lezot?
2 Konpran lezot dimoun: I annan ki ankoler avek nou akoz zot pa kontan laverite, e i annan ki ankoler pour en rezon ki napa nanryen pour fer avek nou mesaz. Petet nou’n vin kot zot dan en move moman. I kapab ki sa met lakour i ankoler akoz son bann problenm personnel. Menm si i sa bon nouvel ki’n fer li ankoler, nou devret touzour gard antet ki i ankoler akoz i’n ganny anbete. (2 Kor. 4:4) Kan nou konpran lezot, sa pou ed nou reste kalm e realize ki zot pa pe ankoler avek nou personnelman.—Prov. 19:11.
3. Ki mannyer nou demontre respe pour sa met lakour?
3 Demontre respe: Bokou dimoun dan nou teritwar i atase avek zot krwayans. (2 Kor. 10:4) Zot annan sa drwa deside si zot pou ekout nou oubyen non. Nou pa pou zanmen anvi fer sa met lakour santi ki son krwayans pa enportan oubyen montre nou pli siperyer ki li. Si nou ganny demande pour ale, nou devret kit sa lakour avek respe.
4. Ki savedir koz avek ladouser?
4 Koz avek ladouser: Menm si nou ganny abize verbalman, nou devret koz avek ladouser e dan en fason agreab. (Kol. 4:6; 1 Pyer 2:23) Dan plas argimante, esey koz lo bann keksoz ki zot annan an komen. Petet nou kapab demann sa met lakour dan en fason byen zantiy kwa ki fer li annan sa pwennvi. Me parler, i pli bon aret sa konversasyon pour apez son lakoler.—Prov. 9:7; 17:14.
5. Ki byenfe nou gannyen kan nou gard lape dan predikasyon?
5 Si nou en dimoun ki kontan fer lape, sa i kapab fer sa met lakour anvi ekoute laprosenn fwa ki en dimoun i esey rann li temwannyaz. (Rom. 12:20, 21) Menm si i paret ki sa met lakour pa pou sanz son pwennvi, mazinen ki i kapab vin nou frer oubyen ser en zour. (Gal. 1:13, 14) Nenport ki desizyon i pran an rapor avek laverite, nou pou onor Zeova e fer nou mesaz pli atiran si nou demontre kontrol lo nou lekor e gard lape avek lezot.—2 Kor. 6:3.