Annan Lardyes, anmenmtan reste anpe avek lezot
1 Bokou dimoun ki nou pres avek i eksprim sa ki zot senserman krwar ladan ki lekontrer avek laverite Labib. Menm si nou devret pres avek lardyes nou swete “viv anpe avek tou dimoun” e evit ofans zot pour nanryen. (Rom. 12:18; Akt 4:29) Ki mannyer nou kapab annan lardyes e anmenmtan reste anpe avek lezot ler nou pe prezant mesaz Rwayonm?
2 Rod bann Pwen kot zot tonm dakor: En dimoun ki viv anpe avek lezot i evit argimante. I pa neseser pour kestyonn krwayans en dimoun ki i byen atase avek akoz sa pou fer li pa aksepte sa mesaz. Si i dir en keksoz ki fo petet nou kapab avek bon zizman entrodwir en pwen lo ki tou le de i dakor. Par met lanfaz lo sa ki nou annan an komen, nou kapab arive fer li rezet okenn santiman negatif e tous son leker.
3 Si nou les pase en fo pwennvi ki sa met lakour in dir, eski nou pe fer en konpromi oubyen bes standar laverite? Non. Nou travay konman bann minis Kretyen i pa pour montre ki nou pa dakor avek tou bann fo konsep bann dimoun ki nou zwenn, me pour pres sa bon nouvel lo Rwayonm Bondye. (Mat. 24:14) Si en dimoun i eksprim en fo pwennvi, olye montre ki nou pa dakor nou kapab servi sa loportinite pour konn plis lo sa ki sa dimoun i mazinen.—Prov. 16:23.
4 Prezerv son Dinite: I annan moman kot nou bezwen annan lardyes ek kouraz pour montre ki nou pa dakor avek bann fo lansennyman. Konman bann dimoun ki viv anpe avek lezot, sepandan, nou rezet sa tandans pour monk oubyen servi bann parol ki abes bann ki krwar e ansenny sa ki fo. Si nou fer nou pas pour pli siperyer, sa pou fer dimoun evit nou. Me si nou montre limilite e apros zot dan en fason amikal, sa bann ki kontan laverite pou pare pour ekoute. Par montre respe anver bann ki ekout nou ek zot krwayans, nou pou prezerv zot dinite e fer li pli fasil pour zot aksepte nou mesaz.
5 Zapot Pol ti pran an konsiderasyon krwayans bann dimoun avek ki i ti prese. I ti rod fason pour prezant sa bon nouvel dan en mannyer pour tous zot leker. (Akt 17:22-31) I ti pare pour “vin tou avek tou dimoun” pour kapab “sov de-trwa parmi zot par tou mannyer posib.” (1 Kor. 9:22) Nou kapab fer parey par reste anpe avek tou dimoun anmenmtan ki nou pres avek lardyes sa bon nouvel Rwayonm.