Ki mannyer pour rann temwannyaz an servan en prezantwar

Temwannyaz avek en prezantwar oubyen en latab i en fason vreman efikas pour atir bann dimoun ki annan en leker senser anver laverite. (Zan 6:44) Alor, bann ansyen in ganny ankouraze pour organiz temwannyaz an piblik dan teritwar zot kongregasyon kot bokou dimoun i ale vini. Vi ki sa prezantwar pa reste en sel plas parey en latab, i pa neseser demann permisyon avek bann lotorite. Lekel ki kalifye pour servi prezantwar? Se bann proklanmater ki annan bon zizman, ki azir e abiy dan en fason respektab e ki annan bann abilite pour fer en bon konversasyon. Sa lenformasyon ki swiv i bann keksoz ki nou devret fer e pa devret fer ki pou ed bann proklanmater reisi dan sa laspe predikasyon.

Ou devret:

Azir dan en fason amikal, akeyan e pare pour ed bann ki pe pase. Serten proklanmater i fer en zoli sourir senser e dir bonzour dan en fason amikal. Si en dimoun ki pe pase i get sa prezantwar, petet ou kapab dir, “Ou kapab pran en piblikasyon si ou oule.”
Debout en distans apropriye avek sa prezantwar. Dan serten landrwa bann proklanmater i reisi ganny bann bon leksperyans ler zot debout de pa avek sa prezantwar. Lezot i vwar ki sa kalite metod i fer bann dimoun ki pe pase ezite pour arete, alor zot debout en pti pe pli lwen e espere ziska ki en dimoun i aret o bor prezantwar. Dek ki en dimoun i vin kot prezantwar, esey konmans en konversasyon, petet par dir, “Eski ou’n deza mazin lo sa kestyon avan?”
Servi Labib otan posib.
Eksplik lafason ki en letid Labib i ganny fer avek en dimoun ki pran enn bann piblikasyon letid, tel parey sa liv Ki Labib i vreman dir? Ofer pour zwe sa video Akfer etidye Labib? lo ou lekipman elektronik.
Pran kontak bann ki enterese ler i posib. Si en dimoun pa reste dan ou teritwar, ranpli sa form Please Follow Up (S-43) e donn avek sekreter dan ou kongregasyon osito posib.