KI MANNYER NOU KAPAB SIRMONT LAENN

1 | Pa fer lapreferans

Sa ki Labib i dir:

“Bondye pa fer lapreferans, me dan tou nasyon, sa ki annan en gran respe pour li e ki fer sa ki drwat i ganny son laprouvasyon.”—AKT 10:34, 35.

Ki i vedir:

Zeovaa Bondye pa ziz nou dapre nou nasyonalite, ras, kouler lapo oubyen kiltir. O kontrer, i konsantre lo sa dimoun ki nou vreman ete anndan. Labib i osi dir ki “zonm i vwar zis laparans, me Zeova i vwar sa ki i annan dan leker.”—1 Samyel 16:7.

Sa ki ou kapab fer:

Menm si nou pa kapab vwar sa ki i annan dan leker en dimoun, nou kapab esey imit Bondye e pa fer lapreferans. Esey vwar dimoun konman en endividi olye konman en group. Si ou santi ki ou annan bann santiman negatif anver lezot petet akoz zot ras oubyen nasyonalite, priy Bondye e demann li pour ed ou pour aret santi dan sa fason. (Psonm 139:23, 24) Si ou senserman demann Zeova pour ed ou pour pa fer lapreferans, ou kapab asire ki i pou ekout ou lapriyer e i pou ed ou.—1 Pyer 3:12.

a Dapre Labib, Zeova i non Bondye.—Psonm 83:18.

“Mon pa’n zanmen deza asize anpe avek en dimoun blan . . . Aprezan mon form parti sa gran lasosyasyon frer ek ser enternasyonal.”—TITUS

En leksperyans—TITUS

I ti sirmont laenn

Titus ti vreman ankoler anver bann lalwa ki ti anpes bann dimoun nwanr melanz avek dimoun blan. Sa ti fer Titus zwenn ansanm avek lezot zonm vyolan ki ti santi parey li. I dir: “Nou ti al dan bann landrwa dan lavil parey lotel ek bar ki pa ti les dimoun nwanr antre, zis pour nou al rod lager.” Titus i dir ki i ti ranpli avek laenn e sa ti fer li vin vyolan. I ti osi dir: “Si mon pa ti dakor avek sa ki en dimoun i dir, ki swa en zonm oubyen en madanm, mon ti toultan sa enn premye pour konmans lager.”

Titus ti fer sanzman ler i ti konmans etidye Labib avek Temwen Zeova. Ler i ti lir Labib, sa ti annan en gran lefe lo li. Sa promes konsernan sa ki pou arive dan lavenir ki dir “i pou nepli annan ni lanmor, ni dey, ni leokri, ni douler ankor,” ti vreman tous li.—Revelasyon 21:3, 4.

O konmansman, Titus ti lite pour retir sa laenn dan son leker. I dir: “I ti vreman difisil pour sanz mon fason panse e lafason ki mon azir.” Me sa ki i ti aprann dan Akt 10:34, 35 ki dir Bondye pa fer lapreferans ti ed li.

Ki mannyer sa ti ed li? Titus i dir: “Ler mon ti vwar sa lanmour ki egziste parmi bann Temwen Zeova, malgre zot ras oubyen kouler, mon ti asire ki zot pratik sa vre larelizyon. Menm avan mon ti batize konman en Temwen Zeova, en frer blan dan kongregasyon ti envit mwan manze kot li. Mon pa ti oule krwar si sa ti vre. Mon pa’n zanmen deza asize anpe avek en dimoun blan, me la mon ti pe manze ansanm avek li dan son lakaz. Aprezan mon form parti sa gran lasosyasyon frer ek ser enternasyonal.”