Zeova i oule ki tou dimoun i repantir

1. Ki en dimoun i bezwen fer pour repantir?

LER nou fer keksoz mal, i enportan ki nou repantir. Dan Labib, en dimoun ki repantir i sanz son fason panse konsernan en move aksyon, i aret fer sa aksyon e i determinen pour pa repet li.—Vwar Leksplikasyon bann mo “Repantans, repantir.”

2. Akoz nou tou nou devret aprann konsernan repantans? (Neemya 8:9-11)

² Tou imen i bezwen aprann konsernan repantans. Akoz? Akoz nou tou nou fer pese tou le zour. Konman bann desandans Adan ek Ev, sakenn ant nou in erit pese ek lanmor. (Rom. 3:23; 5:12) Napa enn ant nou ki’n ganny eparnyen. Menm bann zonm fidel parey zapot Pol ti lalit avek pese. (Rom. 7:21-24) Eski sa i vedir ki nou pou toultan dan lapenn akoz nou bann pese? Non, akoz Zeova i pran pitye e i anvi ki nou zwaye. Annou vwar leksperyans bann Zwif dan letan Neemya. (Lir Neemya 8:9-11.) Zeova pa ti anvi ki zot ti sagren akoz bann pese ki zot ti’n fer dan lepase, i ti anvi ki zot ador li dan lazwa. Zeova i konnen ki ler nou repantir sa i ed nou pour annan lazwa. Sanmenm i ansenny nou lo lenportans pour repantir. Si nou repantir pour nou bann pese, nou kapab asire ki nou Papa ki pran pitye pou pardonn nou.

3. Ki nou pou vwar dan sa lartik?

³ Dan sa lartik, nou pou aprann plis konsernan repantans e nou pou vwar trwa keksoz ki enplike ler en dimoun pe repantir. Premyerman, nou pou aprann sa ki Zeova ti ansenny nasyon Izrael konsernan repantans. Apre, nou pou aprann ki mannyer Zeova i ed bann ki’n fer pese pour repantir. Finalman, nou pou vwar ki Zezi Kri ti ansenny son bann disip konsernan repantans.

KI ZEOVA TI ANSENNY BANN IZRAELIT KONSERNAN REPANTANS?

4. Ki Zeova ti ansenny nasyon Izrael konsernan repantans?

⁴ Ler Zeova ti form nasyon Izrael, i ti fer en lalyans avek zot. I ti promet zot ki si zot ti obeir son bann lalwa, i ti pou protez e beni zot. I ti dir zot konsernan sa bann lalwa: “Sa komannman ki mon pe donn ou ozordi i pa tro difisil pour ou e i pa tro difisil pour ou arive obeir li.” (Det. 30:11, 16) Me si zot ti rebel kont li, par egzanp si zot ti swazir pour ador lezot bondye, i ti pou aret beni zot e zot ti pou soufer. Kantmenm sa, zot ti ankor kapab reganny laprouvasyon Zeova. Zot ti pou kapab ‘retourn kot Zeova zot Bondye e ekout li.’ (Det. 30:1-3, 17-20) Zot ti kapab repantir. Si zot ti fer sa, Zeova ti pou apros avek zot e beni zot ankor.

5. Ki mannyer Zeova ti montre ki i pa ti bes lebra ler son pep ti dezobeir li? (2 Lerwa 17:13, 14)

⁵ Sa pep ki Zeova ti’n swazir ti kontinyelman rebel kont li. Apard ki ador zidol, zot ti osi fer bann keksoz degoutan e zot ti soufer pour sa. Me Zeova pa ti abandonn son pep. I ti kontinyen anvoy bann profet pour demann zot pour repantir e retourn kot li.—Lir 2 Lerwa 17:13, 14.

6. Ki mannyer Zeova ti servi son bann profet pour ansenny son pep lenportans pour repantir? (Vwar portre.)

⁶ Ler son pep ti dezobeir li, souvan Zeova ti servi bann profet pour averti zot e koriz zot. Par egzanp, Bondye ti dir zot atraver Zeremi: “Izrael ki pa fidel, retournen. . . . Mon pa pou ankoler avek zot, parski mon fidel. Mon pa pou reste ankoler pour touzour. Zis rekonnet ki ou koupab parski ou’n rebel kont Zeova.” (Zer. 3:12, 13) Atraver Zoel, Zeova ti dir: “Retourn kot mwan avek tou zot leker.” (Zoel 2:12, 13) I ti fer Izai dir: “Fer zot prop. Aret fer bann move keksoz devan mwan. Aret fer sa ki mal.” (Iza. 1:16-19) Zeova ti osi demann son pep atraver Ezekyel: “Eski i fer mwan plezir ler en move dimoun i mor? Pa mon prefere ki i sanz son fason viv e i kontinyen viv? . . . Mon pa pran plezir dan lanmor personn. Alor, aret fer sa ki mal e kontinyen viv.” (Ezek. 18:23, 32) Zeova i pran plezir ler i vwar dimoun repantir akoz i anvi ki zot viv pour touzour. Alor Zeova pa zis esper dimoun ki’n fer pese sanze avan ki i ofer zot son led. Annou vwar enn de legzanp.

7. Ki mannyer Zeova ti servi legzanp profet Osea ek son madanm pour ansenny son pep?

⁷ Remarke ki mannyer Zeova ti ansenny son pep atraver en legzanp reel, legzanp Gomer, madanm profet Osea. Apre ki i ti’n komet adilter, i ti kit Osea pour al avek lezot zonm. Eski i ti enposib pour li repantir? Zeova ki kapab lir dan leker ti dir Osea: “Ankor enn fwa, al kontan sa madanm ki en lot dimoun i kontan e ki pe komet adilter, zis parey Zeova i kontan pep Izrael menm si zot tourn ver lezot bondye.” (Ose. 3:1; Prov. 16:2) Not byen ki madanm Osea ti ankor pe fer pese grav. Kantmenm sa, Zeova ti demann Osea pour al kot li, pour pardonn li e repran li konman son madanm.a Zeova ti servi sa legzanp pour ansenny son pep ki mannyer i ti santi anver zot. Menm si zot ti pe kontinyen fer sa bann move keksoz, i ti ankor kontan zot e i ti kontinyen anvoy son bann profet kot zot pour ed zot repantir e sanz zot fason fer. Eski sa legzanp i montre nou ki Zeova, sa Enn ki egzamin leker i esey ed dimoun ki ankor pe fer pese grav pour repantir? (Prov. 17:3) Annou vwar.

KI MANNYER ZEOVA I ED BANN KI FER SA KI MAL POUR REPANTIR?

8. Ki mannyer Zeova ti esey ed Kaen pour repantir? (Zenez 4:3-7) (Vwar osi portre.)

⁸ Kaen ti premye garson Adan ek Ev. I ti erit sa dezir pour fer sa ki mal avek son paran. Labib i osi dir konsernan li: “I ti fer sa ki move.” (1 Zan 3:12) Petet sanmen sa rezon ki Zeova “pa ti aksepte lofrann Kaen” ler i ti ofer en sakrifis. Olye sanz son fason fer, “Kaen ti pran en gran lakoler e i ti dezapwente.” Ki Zeova ti fer apre? I ti koz avek Kaen. (Lir Zenez 4:3-7.) Zeova ti koz zantiman avek Kaen, i ti dir li ki i pou beni li si i fer sa ki byen. Zeova ti osi averti Kaen ki son lakoler ti pou kapab fer li fer keksoz mal. Malerezman, Kaen ti refize ekoute. I pa ti les Zeova ed li repantir. Apre sa reaksyon negatif, eski Zeova ti aret esey ed bann ki fer sa ki mal pour repantir? Pa ditou!

9. Ki mannyer Zeova ti ed David repantir?

⁹ Zeova ti kontan Lerwa David en kantite. I ti menm apel li “en zonm ki fer mwan plezir.” (Akt 13:22) Me David ti fer bann pese vreman grav, enkli adilter ek mert. Dapre Lalwa Moiz, David ti merit lanmor. (Lev. 20:10; Nom. 35:31) Me Zeova ti anvi ed David pour repantir.b I ti anvoy profet Natan kot li, menm si David pa ti ankor montre okenn siny repantans. Natan ti servi en legzanp pour ed David konpran ki i ti’n fer en pese vreman grav. David ti realize ki i ti’n bles Zeova en kantite e i ti repantir. (2 Sam. 12:1-14) I ti ekri en psonm ki montre ki kantite i ti’n regrete sa ki i ti’n fer. (Ps. 51, lentrodiksyon) Sa psonm in rekonfort bokou dimoun ki’n fer pese e ed zot pour repantir. Pa nou vreman rekonesan ki Zeova ti ed son serviter David avek lanmour, pour repantir?

10. Ki mannyer ou santi ler ou konnen ki Zeova i annan pasyans avek nou e i pardonn nou?

¹⁰ Zeova i ay tou sort kalite pese. (Ps. 5:4, 5) Par kont, i konnen ki nou tou nou fer pese e akoz i kontan nou, i swazir pour ed nou pour lalit avek pese. I toultan esey ed menm bann ki fer bann pese vreman grav pour repantir e apros avek li. I vreman rekonfortan pour konnen ki Zeova i anvi pardonn nou. Anmezir nou reflesir lo pasyans ek pardon Zeova, nou determinen pour reste fidel avek li e pour repantir deswit ler nou fer pese. Aprezan, nou pou vwar ki Zezi ti ansenny son bann disip konsernan repantans.

SA KI ZEZI TI ANSENNY SON BANN DISIP KONSERNAN REPANTANS

11-12. Ki legzanp Zezi ti servi pour ansenny nou ki Zeova i pare pour pardonn nou? (Vwar lo kouvertir.)

¹¹ Dan premye syek, ler ti’n arive pour Mesi vini. Parey in ganny mansyonnen dan sa lartik avan, Zeova ti servi tou le de Zan ki batize ek Zezi Kri pour ansenny dimoun akoz i enportan pour repantir.—Mat. 3:1, 2; 4:17.

¹² Pandan son minister, Zezi ti ansenny bann dimoun ki son Papa i pare pour pardonn nou ler nou fer pese. I ti fer sa dan en fason remarkab ler i ti rakont legzanp garson perdi. Sa garson ti swazir pour kit son lakour e pour al viv en move lavi. Me i “ti realize sa ki i ti’n fer” e i ti retourn kot li. Ki mannyer son papa ti reazir? Zezi ti dir, ler sa garson “ti ankor en bon pti zistans dan semen, son papa ti vwar li e son leker ti fermal. Son papa ti tay kot li, may li e anbras li.” Sa garson pa ti ekspekte ki son papa ti pou pardonn li. Alor i ti demande pour travay konman en serviter kot lakour. Me son papa ti pare pour pardonn li. I ti apel li “mon garson” e i ti aksepte li dan lafanmir. Sa papa ti dir: “I ti’n perdi e i’n ganny retrouve.” (Lik 15:11-32) Ler Zezi ti dan lesyel avan ki i ti vin lo later, sirman i’n vwar plizyer fwa ki mannyer son Papa in demontre konpasyon e vitman pardonn sa bann ki’n repantir. Sa legzanp ki Zezi in servi i vreman rekonfortan e i montre nou ki Zeova i en Papa ki annan pitye.

13-14. Ki zapot Pyer ti aprann konsernan repantans e ki i ti ansenny lezot lo la? (Vwar osi portre.)

¹³ Zapot Pyer ti aprann en kantite keksoz avek Zezi lo ki mannyer pour repantir e ganny pardonnen. Souvan Pyer ti fer fot e Zezi ti pare pour pardonn li. Par egzanp, apre trwa fwa ki Pyer ti’n dir i pa konn Zezi, i ti vreman sagren akoz sa ki i ti’n fer. (Mat. 26:34, 35, 69-75) Me apre ki Zezi ti’n resisite, i ti aparet avek Pyer, aparaman an prive. (Lik 24:33, 34; 1 Kor. 15:3-5) San dout, sa zour Zezi ti pardonn e reasir sa zapot ki ti’n repantir.—Vwar Mark 16:7.

¹⁴ Pyer ti konpran ki mannyer en dimoun i santi apre ki i’n repantir e ganny pardonnen. Alor i ti ansenny lezot lo la. En pe letan apre lafet Lapannkot, Pyer ti koz avek en lafoul Zwif. I ti eksplik zot ki zot ti’n touy Mesi. Me kantmenm sa, i ti demann zot pour “repantir e sanz zot lavi pour ki zot pese i ganny efase e ki Zeova li menm i donn zot soulazman.” (Akt 3:14, 15, 17, 19) Alor Pyer ti montre ki ler en dimoun i repantir i bezwen sanz son move fason panse e azir, aret fer sa ki mal e fer sa ki fer plezir Zeova. Sa zapot ti fer vwar ki Zeova ti pou pardonn zot konpletman, konmsi i efas zot pese totalman. Plizyer dizenn lannen pli tar, Pyer ti dir bann Kretyen: “Zeova . . . i pasyan avek zot akoz i pa oule ki personn i ganny detrir, me i oule ki zot tou zot arive repantir.” (2 Pyer 3:9) Sa i en zoli lespwar pour bann Kretyen ler zot fer pese, menm bann pese grav.

15-16. (a) Ki zapot Pol ti aprann konsernan pardonnen? (1 Timote 1:12-15) (b) Ki nou pou diskite dan sa lartik ki swiv?

¹⁵ Napa bokou dimoun ki’n deza bezwen repantir e ganny pardonnen parey Sol sorti Tars. I ti persekit bann disip Kris dan en fason kriyel. Laplipar Kretyen ti panse ki petet i pa ti pou zanmen sanze. Me Zezi ti konnen ki Sol ti kapab sanze e repantir. Li avek son Papa zot ti vwar bann bon kalite dan Sol. Zezi ti dir: “Mon’n swazir sa zonm.” (Akt 9:15) Zezi ti menm servi en mirak pour ed Sol repantir. (Akt 7:58–8:3; 9:1-9, 17-20) Apre ki i ti’n vin en Kretyen, Sol ki pli tar ti ganny apele zapot Pol ti souvan eksprim son lapresyasyon pour lafason ki Zeova ek Zezi ti demontre labonte ek pitye anver li. (Lir 1 Timote 1:12-15.) Sa zapot ki ti vreman rekonesan ti dir son bann frer ek ser ki “Bondye dan son labonte pe esey ed [zot] pour repantir.”—Rom. 2:4.

¹⁶ Ki zapot Pol ti fer ler i ti aprann ki kongregasyon Korent ti’n permet en zonm ki ti’n komet imoralite seksyel pour reste dan kongregasyon? Sa ki i ti fer i ansenny nou en kantite lo lafason ki Zeova i disiplin avek lanmour e lo lenportans pour demontre pitye. Nou pou vwar sa en pe pli an detay dan sa lartik ki swiv.