Ki mannyer lager ek konfli vyolan i afekte nou tou?
“Lemonn pe fer fas avek sa pli gran kantite konfli vyolan ki’n deza annan depi Dezyenm Lager Mondyal. Enn lo kat dimoun ki viv lo later, setadir 2 bilyon dimoun i reste dan bann landrwa ki’n ganny afekte par sa bann konfli vyolan.”
Depite sekreter zeneral Nasyon-z-ini Amina J. Mohammed, 26 Zanvye 2023.
Lager ek konfli vyolan i kapab deklare en sel kou dan bann landrwa ki ou pa ti pe ekspekte. Menm bann dimoun ki pa reste dan sa landrwa kot i annan lager i kapab ganny afekte akoz tou bann pei lemonn i pli konekte ansanm ki zanmen oparavan. Apre ki lager in fini, bann move lefe i reste pour en kantite letan. Annou vwar serten legzanp:
Mankman manze. Dapre World Food Programme, “lager i rezon prensipal akoz i annan mankman manze. Laplipar dimoun ki napa ase manze i reste dan bann landrwa kot i annan lager.”
Bann problenm fizik ek lasante mantal. Ler i paret ki lager i kapab arive dan en landrwa, bann dimoun dan sa landrwa i strese e enkyet. Zot kapab ganny dimal e devlop bann problenm lasante mantal. Malerezman, lapliparditan zot pa kapab ganny akse avek led medikal ki zot bezwen.
Ganny forse pour kit ou lakour. Dapre United Nations High Commissioner for Refugees, depi Septanm 2023, plis ki 114 milyon dimoun dan lemonn in ganny forse pour kit zot lakour. Rezon prensipal i akoz lager ek konfli vyolan.
Problenm ekonomik. Lager i souvan lakoz pour bann problenm ekonomik. Par egzanp, bann keksoz i kontinyen vin pli ser. Dimoun i soufer akoz gouvernman i depans bokou larzan dan bann zafer militer ki normalman ganny depanse dan servis swen lasante ek ledikasyon. Apre ki lager in fini, i vreman ser pour rekonstri e repar bann domaz.
Bann problenm lanvironnman. Dimoun i soufer ler bann resours natirel ki zot depan lo la dan landrwa kot zot reste i ganny detrir. Letan delo, ler ek later i ganny polye sa i kapab anmenn bann problenm lasante ki dire pour en kantite letan e apre ki lager in fini, bann dimoun i kapab ganny dimal oubyen touye par bann leksplozif ki’n ganny kit deryer.
San dout, lager i anmenn destriksyon e i kout bokou.