Ki mannyer lager ek konfli vyolan pou fini?

BONDYE POU ELIMIN BANN GOUVERNMAN IMEN

Bondye pou detrir bann gouvernman imen dan sa lager ki Labib i apel Armagedon.a (Revelasyon 16:16) Sa letan, “bann lerwa partou lo later” pou zwenn ansanm pour “sa lager sa gran zour Bondye Tou Pwisan.” (Revelasyon 16:14) Armagedon pou sa dernyen lager ki’n deza arive lo later.

Bondye pou ranplas bann gouvernman imen avek son Rwayonm oubyen gouvernman ki pou dirize dan lesyel e ki pa pou zanmen ganny detrir. (Danyel 2:44) Bondye in swazir son Garson, Zezi Kri, pour vin Lerwa. (Izai 9:6, 7; Matye 28:18) Sa gouvernman, i sa Rwayonmb ki Zezi ti ansenny son bann disip pour priye. (Matye 6:9, 10) Tou imen pou ini ansanm anba en sel gouvernman ki pou diriz lo later antye avek Zezi konman Dirizan.

Konpare avek bann dirizan imen, Zezi pa pou servi son pouvwar pour rezon egois. I zis e i pa fer lapreferans, alors personn pa pou bezwen trakase si i pou ganny neglize oubyen ganny trete dan en fason enzis akoz son ras, nasyonalite oubyen ran sosyal. (Izai 11:3, 4) Dimoun pa pou bezwen lager pour zot drwa. Akoz non? Parski Zezi pou pran lentere dan byennet sak dimoun. “I pou sov bann pov ki pe demann led, bann malere e bann ki napa personn pour ed zot. . . . I pou sov bann ki soufer akoz vyolans ek labi.”—Psonm 72:12-14.

Rwayonm Bondye pou retir tou bann zarm ki kapab detrir en kantite dimoun. (Mika 4:3) I pou osi detrir bann move dimoun ki refize aret lager oubyen ki anpes lezot viv anpe. (Psonm 37:9, 10) Tou zonm, fanm ek zanfan pou santi zot an sekirite nenport landrwa kot zot ete lo later.—Ezekyel 34:28.

Ler gouvernman Bondye pou diriz later, tou dimoun pou annan en lavi parfe. I pou elimin bann problenm ki fer dimoun lager parey lapovrete, lafamin ek problenm lakaz. Tou dimoun pou ganny manze annabondans e zot pou kapab rezouir en landrwa konfortab pour zot reste.—Psonm 72:16; Izai 65:21-23.

Rwayonm Bondye pou retir tou bann move lefe ki lager in anmennen. Sa i enkli pa zis bann blesir fizik me osi mantal ek douler emosyonnel ki fer dimoun soufer akoz bann keksoz terib ki’n arive pandan lager. Menm bann ki’n mor pou resisite e viv ankor lo later. (Izai 25:8; 26:19; 35:5, 6) Bann fanmir pou ini ansanm e bann move souvenir akoz lager pou form parti “bann keksoz avan [ki’n] fini disparet.”—Revelasyon 21:4.

BONDYE POU ELIMIN PESE

Ler Rwayonm Bondye pou diriz lo later antye, tou dimoun pou ador sa sel vre Bondye, Zeovac, sa “Bondye lanmour ek lape.” (2 Korentyen 13:11) Dimoun pou aprann ki mannyer pour viv ansanm dan lape. (Izai 2:3, 4; 11:9) Bann ki obeir Bondye pou ganny libere avek pese e zot pou vin parfe.—Romen 8:20, 21.

BONDYE POU ELIMIN SATAN EK SON BANN DEMON

Rwayonm Bondye pou detri bann ki enfliyans dimoun pour lager. (Revelasyon 20:1-3, 10) San zot bann move lenfliyans, “lape pou partou kote.”—Psonm 72:7.

Ou kapab annan konfyans ki promes Bondye pour met en lafen avek lager ek konfli vyolan pou vin vre. I annan sa abilite ek dezir pour elimin lager.

• Bondye i annan sa lasazes ek pouvwar ki neseser pour met en lafen avek lager ek vyolans. (Zob 9:4) Napa nanryen ki enposib pour Bondye akonpli.—Zob 42:2.

• Bondye pa kontan vwar dimoun soufer. (Izai 63:9) I osi “ay nenport dimoun ki kontan vyolans.”—Psonm 11:5.

• Bondye i toultan gard son parol e i pa kapab koz manti.—Izai 55:10, 11; Tit 1:2.