Ki mannyer ou kapab annan lape malgre lager ek konfli vyolan?
Gary ki ti dan larme, i dir, “Avan konmans etidye Labib, mon ti napa okenn nide akoz i annan sitan kriyote, lenzistis ek problenm dan lemonn. Me aprezan mon annan lape lespri. Mon konnen ki Bondye Zeova pou fer lemonn vin en landrwa ki an sekirite.”
Pa zis Gary ki santi koumsa. Vwar ki mannyer Labib in ed lezot.
LABIB I DIR: “Ou, O Zeova, ou bon e pare pour pardonnen.”—Psonm 86:5.
LAFASON KI SA I EDE: “Sa verse i asir mwan ki Zeova i pran pitye. Mon konnen ki i pare pour pardonn mwan pour tou sa ki mon’n fer dan lepase ler mon ti partisip dan lager.”—Wilmar, Lakolonbi.
LABIB I DIR: “Mon pe kree en nouvo lesyel ek en nouvo later. Personn pa pou rapel bann keksoz ki’n arive dan lepase e sa bann keksoz pa pou dan zot leker.”—Izai 65:17.
LAFASON KI SA I EDE: “Mon soufer avek bann move souvenir ek depresyon akoz mon bann leksperyans dan militer. Me sa verse i fer mwan rapel ki byento Zeova pou fer mwan oubliy tou sa bann move souvenir ki mon annan. Zot pou nepli reste dan mon lespri ek leker. Sa i en zoli kado!”—Zafirah, Leta-z-ini.
LABIB I DIR: “Ler i pe dirize, bann ki fer sa ki byen pou fleri e lape pou partou kote ziska ki lalin i nepli.”—Psonm 72:7.
LAFASON KI SA I EDE: “Mon souvan mazin sa bann parol. Byento lager ek bann keksoz terib ki i anmennen pou fini e nou pa pou bezwen trakas konsernan sekirite bann dimoun ki nou kontan ankor.”—Oleksandra, Likrenn.
LABIB I DIR: “Ou bann dimoun mor pou vin vivan. . . . Leve e kriye dan lazwa, zot ki reste dan lapousyer!”—Izai 26:19.
LAFASON KI SA I EDE: “Laplipar mon fanmir ti ganny touye dan zenosid kont bann Tutsi. Me sa verse i reasir mwan ki mon pou vwar zot ankor. Mon pe espere pour tann zot bann zoli lavwa ler zot resisite!”—Marie, Rwannda.
LABIB I DIR: “Dan ankor en pti pe letan, bann move dimoun pou nepli la . . . Me bann ki annan limilite pou ganny donnen later e zot pou vreman dan lazwa akoz lape pou annabondans.”—Psonm 37:10, 11.
LAFASON KI SA I EDE: “Menm si lager in fini i ankor annan lenzistis ek move dimoun. Sa bann verse in ed mwan en kantite. Zeova i vwar tou e i konpran mon sityasyon. I’n promet ki byento tou soufrans pou fini e tou pou ganny oubliye.”—Daler, Tajikistan.
Sa bann dimoun ki’n ganny mansyonnen dan sa magazin i parmi sa bann milyon Temwen Zeova ki’n ganny led avek Labib pour trouv lape. Zot in aprann ki mannyer pour retir okenn laenn rasyal, nasyonal ek tribi. (Efezyen 4:31, 32) Temwen Zeova pa pran kote dan politik e zot refize pran par dan vyolans.—Zan 18:36.
Temwen Zeova i osi siport kanmarad parey en fanmir ki annan lanmour. (Zan 13:35) Par egzanp, Oleksandra, ki’n ganny mansyonnen pli boner ti bezwen sove avek son ser pour al dan en lot pei akoz lager. I dir: “Ler nou ti travers lafrontyer deswit nou ti vwar bann Temwen Zeova ki ti la pour akeyir nou. Zot sipor in ed nou adapte pour viv dan en nouvo pei konman refizye.”
Temwen Zeova i envit ou pour zwenn avek nou dan nou bann renyon kot nou aprann lo sa mesaz lape ki sorti dan Labib e ki mannyer pour aplik li. Al lo jw.org pour trouv en landrwa pli pros avek ou oubyen pour ganny en letid Labib enteraktif ki gratwit avek en Temwen Zeova an servan sa piblikasyon Viv ere pour touzour!