Lager i terib
Pour bann dimoun ki’n eksperyans lager sa in anmenn bokou douler ek soufrans. Bann solda ek bann sivilyen partou dan lemonn i konn bann soufrans ki lager i anmennen.
BANN SOLDA
“Souvan ou vwar dimoun pe ganny touye ouswa ganny bann blesir grav. Ou pa zanmen santi ou an sekirite.”—Gary, Grannbretanny.
“Mon ti ganny tape avek boulet dan mon ledo ek mon figir e mon’n vwar bokou dimoun pe ganny touye enkli zanfan ek bann aze. Lager i fer ou annan en leker dir.”—Wilmar, Lakolonbi.
“Ler en dimoun i ganny fiziye devan ou, i pa fasil pour ou oubliye. Ou kontinyen tann e vwar sa dimoun pe soufer dan ou lespri. Ou pa pou zanmen oubliy sa dimoun.”—Zafirah, Leta-z-ini.
BANN SIVILYEN
“Mon ti santi konmsi zanmen mon ti pou kapab ere ankor. Ou per pour ou lavi me ou pli per pour lavi ou fanmir ek zanmi.”—Oleksandra, Likrenn.
“Nou ti per pour debout dan laliny pour esper manze depi 2 er bomaten ziska 11 er aswar. Nou ti konnen ki nenport ler nou ti kapab ganny tape avek en boulet.”—Daler, Tajikistan.
“Mon paran ti ganny touye pandan lager. Sa in fer mwan vin en orfelen e ti napa personn pour rekonfort e pran swen avek mwan.”—Marie, Rwannda.
Menm si sa bann dimoun in soufer akoz lager aprezan zot in trouv rekonfor. Deplis, zot asire ki byento pou annan en lafen avek lager ek konfli vyolan. Sa lartik Latour Veyer pou servi Labib pour eksplike ki mannyer sa pou arive.