Ki lezot i aprann letan zot obzerv ou?
1. Ki bann disip Zezi ti aprann ler zot ti obzerv li?
1 Zezi ti dir: “Vin anba mon zoug e aksepte mon legzanp.” (Mat. 11:29, not anba lo paz dan NW.) I evidan ki i ti ansenny lezot pa zis an parol me osi atraver son bon legzanp. Zis mazin tou sa ki son bann disip ti kapab aprann ler zot ti obzerv li. I ti dous, zantiy e annan lanmour pour lezot. (Mat. 8:1-3; Mark 6:30-34) I ti demontre vre limilite. (Zan 13:2-5) Ler bann disip ti akonpanny Zezi dan predikasyon, zot ti vwar ki i ti travay dir e i ti ansenny lezot laverite avek efikasite. (Lik 8:1; 21:37, 38) Ki lefe nou legzanp i annan lo lezot ler zot obzerv nou dan predikasyon?
2. Ki mannyer nou bon laparans ek latitid dan predikasyon i kapab annan en bon lefe lo en met lakour?
2 Met lakour: Ler nou sanz dan en fason respektab, demontre lapolites e annan lentere senser dan lezot, sa i kapab annan en gran lefe lo en met lakour. (2 Kor. 6:3; Fili. 1:27) Zot remarke ki nou souvan servi Labib. Lezot i enpresyonnen kan nou ekout zot avek respe ler zot koze. Pa zanmen krwar ki bon legzanp ki nou kite dan sa domenn napa valer, o kontrer sa i kapab fer dimoun ganny lanvi ekout sa mesaz Rwayonm.
3. Ki bon lefe nou kapab annan lo nou bann frer ek ser Kretyen?
3 Nou bann frer ek ser: Mazin osi sa bon lefe ki nou kapab annan lo nou bann frer ek ser Kretyen. Nou devouman dan predikasyon i kapab motiv lezot pour annan sa menm devouman. Zis parey feray i fit feray, ler nou fer en bon preparasyon pour prezant sa mesaz sa i motiv lezot pour amelyor zot abilite pour prese. (Prov. 27:17) Zefor ki nou fer pour not byen non bann dimoun ki demontre lentere e ki nou pa tarde apre pour retourn vwar zot, i motiv lezot pour fer parey zot osi. Nou pou annan en gran lenfliyans lo nou bann frer ek ser ler nou akonplir plennman nou minister.—2 Tim. 4:5.
4. Akoz nou devret tanzantan egzamin lefe ki nou legzanp i annan lo lezot?
4 Akoz tanzantan ou pa egzamin sa ki ou fer oubyen dir e osi vwar ki lefe ou legzanp i annan lo lezot? Nou bon legzanp pou kapab fer plezir Zeova e i pou fer nou santi parey zapot Pol, ki ti dir: “Imit mwan parey mwan mon imit Kris.”—1 Kor. 11:1.