Pa donn kou-d-pwen dan ler
1. Ki mannyer Premye Korentyen 9:26 i aplikab avek predikasyon?
1 Zapot pol ti ekrir: “Mon pa tay an bonnavini, mon pa fer parey en bokser ki donn kou-d-pwen dan ler.” (1 Kor. 9:26) Pol ti pe refer avek son determinasyon pour akonplir son sel lobzektif, setadir servi Zeova pli byen. Me son parol i osi kapab aplik avek predikasyon. Nou pa anvi donn “kou-d-pwen” oubyen fer zefor dan vid, o kontrer nou anvi demontre lasazes par servi nou zefor pour ganny sa pli bon rezilta. Dan ki fason?
2. Ki mannyer nou kapab imit Pol ek lezot evanzelizater dan premye syek kan nou pe deside kan e kote ki nou pou prese?
2 Al kot dimoun i ete: Pol ek lezot evanzelizater dan premye syek ti al kot zot ti ekspekte vwar dimoun. (Akt 5:42; 16:13; 17:17) Alor, si laplipar dimoun dan nou teritwar i kot lakour apre ler travay, petet sa i pli meyer moman pour fer predikasyon portanport. Pa dan bomaten stenn bis i ranpli avek dimoun ki pe al travay e apre kat-r-er avek bann ki pe mont kot lakour? Ki ler dan lazournen ki plis dimoun i fer konmisyon? Nou kapab ganny plis dimoun ki ekout nou mesaz si nou fer predikasyon lo semen pandan sa bann ler.
3. Ki mannyer nou kapab demontre lasazes dan lafason ki nou pres dan nou teritwar?
3 Demontre lasazes dan lafason ki nou pres dan nou teritwar: Nou bezwen fer atansyon lafason ki nou pres dan nou teritwar pour fer sir ki nou pa pe donn kou-d-pwen dan ler. Par egzanp, si tou dimoun dan en gran group i al pres dan menm landrwa, nou pou perdi bokou letan zis pour organiz e fer sir ki i annan ase travay pour zot fer. Dan sa ka, i ti a pli bon pour kas sa group. Pareyman, kan nou pe pres dan bann teritwar kot lakaz i lwen avek kanmarad, nou pou kapab kouver teritwar pli vit e ganny plis loportinite pour koz avek dimoun si nou al dan bann pti group. Eski nou kapab diminyen lakantite letan ki nou depanse pour vwayaze par rod en teritwar personnel pros o bor kot nou reste?
4. Kwa ki pou ed nou reisi konman bann peser ki “lapes dimoun”?
4 Zezi ti konpar travay ki bann evanzelizater i fer avek bann peser ki “lapes dimoun.” (Mark 1:17) En peser i al lapes avek bi pour atrap pwason. Alor, pour li reisi akonplir son lobzektif, i pa perdi letan pour al kot i annan pwason sa ler ki zot abitye vini. Pa bann peser i vreman demontre lasazes dan lafason ki zot servi zot zefor? Annou demontre menm devouman dan predikasyon.—Ebr. 6:11.